യുഎഇ ഗോൾഡൻ വിസ സ്വന്തമാക്കി പാചകവിദഗ്ധ ലക്ഷ്മി നായർ. വിസാ നടപടികൾ പൂർത്തിയാക്കിയ ദുബായിലെ മുൻനിര സർക്കാർ സേവന ദാതാക്കളായ ഇസിഎച്ച് ഡിജിറ്റൽ ആസ്ഥാനത്ത് വെച്ച് സിഇഒ ഇഖ്ബാൽ മാർക്കോണിയിൽ നിന്നാണ് ലക്ഷ്മി വിസ ഏറ്റുവാങ്ങിയത്. 10 വർഷത്തെ വിസയാണ് പതിച്ചിരിക്കുന്നത്.
ടിവി ചാനലുകളിൽ കുക്കറി ഷോകൾ അവതരിപ്പിക്കുന്ന ലക്ഷ്മി നിരവധി പാചക മത്സരങ്ങളിൽ ജഡ്ജ് ആയും എത്താറുണ്ട്. നേരത്തെ തിരുവനന്തപുരം ലോ അക്കാദമി പ്രിൻസിപ്പലായിരുന്നു ലക്ഷ്മി നായർ.
ബിസിനസ്-ചലച്ചിത്ര-കായിക-സാംസ്കാരിക-സാഹിത്യ രംഗം ഉൾപ്പെടെ വിവിധ മേഖലകളിൽ കഴിവ് തെളിയിച്ചവർക്കാണ് യുഎഇ ഗോൾഡൻ വിസ നൽകുന്നത്. മുമ്പ് മലയാള സിനിമയിൽ നിന്ന് മമ്മൂട്ടി, മോഹൻലാൽ, പൃഥ്വിരാജ്, ദുൽഖർ സൽമാൻ, പ്രണവ് മോഹൻലാൽ, ടൊവിനോ തോമസ്, ആസിഫ് അലി, ആശ ശരത്ത്, ശ്വേതാ മേനോൻ, ഹണി റോസ് തുടങ്ങി നിരവധി താരങ്ങൾക്ക് ഗോൾഡൻ വിസ ലഭിച്ചിരുന്നു.
