27 വർഷത്തിന് ശേഷം കേന്ദ്രമന്ത്രി പദവിയോടെ ‘അമ്മ’യിലേക്ക് തിരിച്ചുവന്ന് സുരേഷ് ഗോപി. താരത്തിന് വൻ സ്വീകരണമാണ് സഹപ്രവർത്തകർ ഒരുക്കിയത്. മോഹൻലാൽ അദ്ദേഹത്തിന് ഉപഹാരം നൽകി ആദരിച്ചു. ഒടുവിൽ വികാരനിർഭരനായ താരം അമ്മയുടെ ആരംഭത്തെയും 1997-ൽ വൈസ് പ്രസിഡൻ്റ് പദവിയിലിരിക്കെ സംഘടനയിൽ നിന്നും പടിയിറങ്ങിപ്പോകേണ്ടി വന്നതിനെക്കുറിച്ചും മൺമറഞ്ഞുപോയ സഹപ്രവർത്തകരേക്കുറിച്ചുമെല്ലാം വാചാലനായി.
‘ഓരോ കഥാപാത്രത്തിലൂടെയും ഞാൻ വിരിഞ്ഞുവരുകയായിരുന്നു. ഞാൻ എന്ന വ്യക്തിയെ മെനഞ്ഞെടുക്കുന്നതിൽ സിനിമ വഹിച്ച പങ്ക് വലുതാണ്. അതിന്റെ ആഴം അളക്കാവുന്നതല്ല. എൻ്റെ കഥാപാത്രങ്ങൾക്കുവേണ്ടി എതിർഭാഗത്ത് നിന്ന് തല്ലുവാങ്ങിയവർ, എനിക്ക് ശക്തി നൽകിയവർ, സോമേട്ടൻ, രാജൻ പി. ദേവ്, എൻ.എഫ്. വർഗീസ്, നരേന്ദ്രപ്രസാദ്… ഒരുപാട് പേരോട് കടപ്പാടുണ്ട്. അതുപോലെ തന്നെ വ്യക്തിയെന്ന നിലയിൽ എനിക്ക് ബലം പകർന്ന കാക്കി എന്ന വേഷത്തെ ആദരവോടെ ഓർക്കുന്നു. സെറ്റിൽ ചായ തന്നവരും ഭക്ഷണം കഴിച്ച പാത്രം കഴുകി വൃത്തിയാക്കിയവരുമെല്ലാം. എന്റെ വ്യക്തിത്വം രൂപപ്പെടുത്തുന്നതിൽ വഹിച്ച പങ്ക് വലുതാണ്’ എന്നാണ് അദ്ദേഹം പറഞ്ഞത്.
അതോടൊപ്പം ദീർഘകാലം അമ്മയുടെ പ്രസിഡൻ്റായിരുന്ന ഇന്നസെൻ്റിനെയും സുരേഷ്ഗോപി സ്നേഹത്തോടെ സ്മരിച്ചു. വലിയ സ്ഫോടനങ്ങളെ ഏറുപടക്കത്തിന്റെ ശബ്ദത്തിലേക്കൊതുക്കിയ അമ്മയുടെ നാഥനായിരുന്നു ഇന്നസെന്റെന്നും നാളെ സംഘടനയെ നയിക്കുന്നവർക്ക് പാഠപുസ്‌തകമാകണം അദ്ദേഹമെന്നും താരം കൂട്ടിച്ചേർത്തു.
