യുഎഇയിൽ സ്വദേശിവത്കരണം ഊർജിതമാക്കുന്നു. 50ന് മുകളിൽ ജീവനക്കാരുള്ള സ്വകാര്യ സ്ഥാപനങ്ങൾ ജൂൺ 30നകം ഒരു സ്വദേശിയെ നിയമിക്കണമെന്നാണ് നിർദേശം. നിയമം ലംഘിക്കുന്ന സ്ഥാപനങ്ങൾക്കെതിരെ കർശന നടപടി സ്വീകരിക്കുമെന്ന് മന്ത്രാലയം മുന്നറിയിപ്പ് നൽകി. ഇതിന്റെ ഭാഗമായി ജൂലൈ 1 മുതൽ പരിശോധനകൾ കർശനമാക്കാനാണ് അധികൃതരുടെ തീരുമാനം.
2022 മുതലാണ് സ്വകാര്യ സ്ഥാപനങ്ങളിൽ സ്വദേശിവത്കരണം ശക്തമാക്കാൻ അധികൃതർ തീരുമാനിച്ചത്. എല്ലാ ആറ് മാസം കൂടുമ്പോഴും ഒരു ശതമാനം എന്ന കണക്കിൽ സ്വദേശി ജീവനക്കാരുടെ അനുപാതം ഉയർത്തണമെന്നാണ് നിർദേശം. ഇത്തരത്തിൽ സ്വദേശികളുടെ എണ്ണം വർധിപ്പിച്ച് 2026 ഓടെ പത്ത് ശതമാനം സ്വദേശികൾക്ക് ജോലി ഉറപ്പാക്കുകയാണ് ലക്ഷ്യം.
നിലവിൽ രാജ്യത്ത് പ്രോപ്പർട്ടി, വിദ്യാഭ്യാസം, നിർമ്മാണം, ആരോഗ്യം ഉൾപ്പെടെയുള്ള വിവിധ മേഖലകളിലാണ് ഏറ്റവും കൂടുതൽ സ്വദേശി നിയമനം നടക്കുന്നത്. അതേസമയം, വ്യാജ സ്വദേശിവത്കരണം നടത്തിയ 1,370ഓളം കമ്പനികൾക്കെതിരെ മന്ത്രാലയം ഇതിനോടകം നടപടി സ്വീകരിക്കുകയും ചെയ്തു. നിയമം ലംഘിക്കുന്ന സ്ഥാപനങ്ങൾക്ക് 20,000 മുതൽ 2 ലക്ഷം ദിർഹം വരെയാണ് പിഴ ചുമത്തുന്നത്.
