സാങ്കേതിക തകരാറിനേത്തുടർന്ന് യാത്രക്കാരെ തിരിച്ചിറക്കി എയർ ഇന്ത്യ എക്സ്പ്രസ്. ഇന്ന് പുലർച്ചെ 3.30-ന് ഷാർജയിൽ നിന്ന് കോഴിക്കോടേയ്ക്ക് പുറപ്പെടാനിരുന്ന വിമാനത്തിൽ നിന്നാണ് യാത്രക്കാരെ തിരിച്ചിറക്കിയത്. ടേക്ക് ഓഫിന് തൊട്ടുമുമ്പാണ് വിമാനത്തിന് സാങ്കേതിക തകരാർ കണ്ടെത്തിയത്.
170-ലധികം യാത്രക്കാരുമായി യാത്ര പുറപ്പെടാനിരുന്ന IX 356 എയർ ഇന്ത്യ എക്സ്പ്രസ് വിമാനമാണ് തിരിച്ചിറക്കിയത്. പുലർച്ചെ 2.30-ന് പുറപ്പെടേണ്ട വിമാനം ഒരു മണിക്കൂർ വൈകുമെന്ന് നേരത്തേ അറിയിപ്പ് ലഭിച്ചിരുന്നു. ഇതനുസരിച്ച് 3.30ന് യാത്രക്കാരെ കയറ്റി റൺവേയിൽ ടേക്ക്ഓഫിന് തയ്യാറെടുക്കവെയാണ് വിമാനത്തിന് സാങ്കേതിക തകരാറുണ്ടെന്ന അറിയിപ്പ് വന്നത്. ഇതോടെ മുഴുവൻ യാത്രക്കാരെയും ഷാർജ വിമാനത്താവളത്തിൽ തിരിച്ചിറക്കുകയായിരുന്നു.
വിമാനം തിരിച്ചിറക്കിയതോടെ എപ്പോൾ യാത്ര പുറപ്പെടുമെന്ന് അറിയാത്ത അവസ്ഥയിലാണ് യാത്രക്കാർ. വിമാനത്താവളത്തിൽ കുടുങ്ങിയ യാത്രക്കാർക്ക് വിമാന കമ്പനി രാവിലെ ഭക്ഷണം വിതരണം ചെയ്തിരുന്നു. എങ്കിലും അത്യാവശ്യത്തിനായി യാത്ര ചെയ്യാനിരുന്നവർ വിമാനത്താവളത്തിൽ കുടുങ്ങുകയായിരുന്നു.
