വനിതകൾക്ക് സുരക്ഷിതമായ യാത്ര ഒരുക്കുന്നതിനായി പുതിയ ആനുകൂല്യങ്ങൾ പ്രഖ്യാപിച്ചിരിക്കുകയാണ് ഇൻഡിഗോ എയർലൈൻ. എന്താണെന്നല്ലേ? ഇനി മുതൽ വനിതാ യാത്രക്കാർക്ക് സീറ്റ് ബുക്ക് ചെയ്യുന്നതിന് മുമ്പ് തൊട്ടടുത്ത സീറ്റിലിരിക്കുന്ന വ്യക്തി പുരുഷനാണോ സ്ത്രീയാണോ എന്ന് അറിയുന്നതിനാണ് ഇൻഡിഗോ അവസരമൊരുക്കുന്നത്.
വെബ് ചെക്ക്-ഇൻ സമയത്ത് മറ്റ് സ്ത്രീ യാത്രക്കാർ മുൻകൂട്ടി ബുക്ക് ചെയ്ത സീറ്റുകൾ ഏതൊക്കെയാണെന്ന് കാണാൻ വനിതാ യാത്രക്കാർക്ക് സാധിക്കും. സ്ത്രീകൾക്ക് പ്രത്യേകിച്ച് ഒറ്റയ്ക്ക് യാത്ര ചെയ്യുന്നവർക്ക് സുരക്ഷിതമായ യാത്ര ഒരുക്കുന്നതിന്റെ ഭാഗമായാണ് ഇൻഡിഗോ പുതിയ പദ്ധതി അവതരിപ്പിച്ചിരിക്കുന്നത്.
ഇതുമായി ബന്ധപ്പെട്ട് നടത്തിയ പഠനത്തിന്റെ അടിസ്ഥാനത്തിലാണ് ഈ സൗകര്യം ഏർപ്പെടുത്തുന്നതെന്നും വനിതകൾക്ക് ഉപകാരപ്രദമാകുമെന്നാണ് വിലയിരുത്തലെന്നും കമ്പനി അധികൃതർ വ്യക്തമാക്കി. നിലവിൽ ഇക്കോണമി ക്ലാസ് മാത്രമുള്ള ഇൻഡിഗോ വിമാനങ്ങളിൽ ആദ്യമായി ബിസിനസ് ക്ലാസ് അവതരിപ്പിക്കാനിരിക്കെയാണ് സ്ത്രീ സൗഹൃദ നടപടി എന്നതും വളരെ ശ്രദ്ധേയമാണ്.
