ആളുകൾക്കിടയിലേക്ക് ഇറങ്ങി ചെന്ന് അവരെ കുടുകുടെ ചിരിപ്പിക്കുക എന്നത് ശ്രമകരമായ കാര്യമാണ്. അത്തരത്തിൽ ജനങ്ങൾക്കിടയിലേക്ക് ഇറങ്ങി ചെന്ന് സ്റ്റേജ് ഷോകളിലൂടെയും മിനി സ്ക്രീൻ റിയാലിറ്റി ഷോകളിലൂടെയും ബിഗ് സ്ക്രീനിലൂടെയും മലയാളികളെ ചിരിപ്പിച്ച മറ്റൊരു കലാകാരൻ കൂടി വിടവാങ്ങിയിരിക്കുന്നു. മിമിക്രി താരവും ചലച്ചിത്ര നടനുമായ കോട്ടയം സോമരാജ് അന്തരിച്ചു. ഏതാനും നാളുകളായി രോഗബാധിതനായി ചികിത്സയിലായിരുന്നു.
മിമിക്രി രംഗത്ത് വര്‍ഷങ്ങളുടെ പാരമ്പര്യമുള്ള കലാകാരനാണ് കോട്ടയം സോമരാജ്. ദീര്‍ഘകാലത്തോളം ടെലിവിഷന്‍, സ്റ്റേജ് പരിപാടികളുടെ തിരക്കഥാകൃത്തായി പ്രവര്‍ത്തിച്ചിട്ടുണ്ട്. കരുമാടി രാജേന്ദ്രന്‍ സംവിധാനം ചെയ്ത ‘ഇന്ദ്രപുരാണം’ എന്ന ചിത്രത്തിന്റെ തിരക്കഥയും സംഭാഷണവും നിർവഹിച്ചത് അദ്ദേഹമാണ്. അഞ്ചര കല്യാണം, കണ്ണകി, ഫാന്റം, ബാംബൂ ബോയ്‌സ്, ഇലകള്‍ പച്ച പൂക്കള്‍ മഞ്ഞ, ചാക്കോ രണ്ടാമന്‍, ആനന്ദ ഭൈരവി, അണ്ണന്‍ തമ്പി, കിംഗ് ലയര്‍ തുടങ്ങിയ സിനിമകളിലും അഭിനയിച്ചു. അനശ്വരനായ കലാകാരന് പ്രണാമം.
