യുഎഇയിലെ നിർമാണ മേഖലകളിലും ഫാക്ടറികളിലും അടക്കം അപകടകരമായ തൊഴിൽ സാഹചര്യങ്ങളിൽ പരുക്കേൽക്കുന്നവരിൽ നാല് ശതമാനം കുറവുണ്ടായതായി മാനവ വിഭവ ശേഷി സ്വദേശിവൽക്കരണ മന്ത്രാലയം അറിയിച്ചു. സ്വകാര്യ മേഖലകളുമായി സഹകരിച്ചുകൊണ്ട് മന്ത്രാലയം നടപ്പാക്കിയ സുരക്ഷാ, നിയമ അവബോധ പരിപാടികളുടെ ഫലമാണിത്. തൊഴിലിടങ്ങളിൽ തൊഴിലാളികൾക്ക് പരുക്കേൽക്കുകയോ, രോഗ ബാധിതനാകുകയോ ചെയ്താൽ നഷ്ടപരിഹാരവും തൊഴിൽ ആനുകൂല്യങ്ങളും തൊഴിലുടമകൾ നൽകണമെന്നാണ് നിയമം.
മുഴുവൻ അവകാശങ്ങളും ആനുകൂല്യങ്ങളും നൽകിയതിന് ശേഷം മാത്രമേ തൊഴിലാളികളുടെ വീസ റദ്ദാക്കാക്കുകയുള്ളു. ഇത്തരത്തിൽ അധികൃതർ കർശന നിലപാട് സ്വീകരിച്ചതോടെ തൊഴിലിടങ്ങളിലെയും ലേബർ ക്യാംപിലെയും ആരോഗ്യ, സുരക്ഷാ കാര്യങ്ങൾ കമ്പനികൾ കൂടുതൽ ഗൗരവത്തിലെടുത്തിട്ടുണ്ടെന്നാണ് വിലയിരുത്തുന്നത്.
ഇത് കൂടാതെ ആരോഗ്യ ഇൻഷുറൻസ് ഏർപ്പെടുത്തിയതും അനുകൂല ഘടകമായി മാറി. തൊഴിലാളികൾക്ക് ആരോഗ്യ, തൊഴിൽ സുരക്ഷ ഒരുക്കാത്തത്തിന്റെ പേരിൽ കഴിഞ്ഞ വർഷം 75,134 നിയമലംഘനങ്ങൾ കണ്ടെത്തിയിരുന്നു. നിയമം ലംഘിച്ചതിന്റെ പേരിൽ 12,855 സ്ഥാപനങ്ങൾക്കെതിരെ നടപടിയെടുക്കുകയും ചെയ്തു. 2019 മുതൽ 2022 വരെയുള്ള കാലയളവിൽ തൊഴിലാളികൾക്ക് പരുക്കേൽക്കുന്ന കേസുകളിൽ 43% കുറവുണ്ടായതായും മന്ത്രാലയം അറിയിച്ചു.
ആരോഗ്യ സുരക്ഷ ഉറപ്പാക്കാൻ പ്രത്യേക പരിശോധന
തൊഴിലിടങ്ങളിലും ലേബർ ക്യാംപുകളിലും ഉദ്യോഗസ്ഥർ ആരോഗ്യ സുരക്ഷ ഉറപ്പുവരുത്താൻ പ്രത്യേകം പരിശോധന നടത്തുന്നുണ്ട്. പരിശോധനാ ഉദ്യോഗസ്ഥർ സ്ഥാപനങ്ങൾ നേരിട്ട് സന്ദർശിച്ച് തൊഴിലിടങ്ങളിൽ പരുക്കേൽക്കുന്നവരുടെ ചികിത്സ, വേതനം, നഷ്ടപരിഹാരം എന്നിവ ഉറപ്പുവരുത്തുന്നത്. തൊഴിലാളികൾക്ക് പരുക്കേൽക്കുമ്പോൾ തൊഴിലുടമകളാണ് തുടർ നടപടികൾക്കായി മുന്നിട്ടിറങ്ങേണ്ടത്. 48 മണിക്കൂറിനകം അധികൃതർക്ക് വിവരം ബന്ധപ്പെട്ടവർക്കും കൈമാറുകയും വേണം. തൊഴിലാളിയുടെ പേര്, ദേശം തിരിച്ചറിയൽ കാർഡ് നമ്പർ, അപകടം നടന്ന സമയം, സ്ഥലം തുടങ്ങി സംഭവത്തിന്റെ പൂർണ വിവരങ്ങൾ കൈമാറണം. ചികിത്സ അവസാനിച്ചാൽ രോഗിയുടെ സമഗ്ര മെഡിക്കൽ റിപ്പോർട്ട് ആരോഗ്യ കേന്ദ്രങ്ങൾ നൽകണം. രോഗിയുടെ ശാരീരിക ക്ഷമതാ റിപ്പോർട്ട് സർക്കാർ മെഡിക്കൽ കേന്ദ്രങൾ സാക്ഷ്യപ്പെടുത്തുകയും വേണമെന്നത് നിർബന്ധമാണ്.
സുരക്ഷാ സംവിധാനം ഇല്ലെങ്കിൽ തൊഴിലാളികൾക്ക് പരാതിപ്പെടാം
തൊഴിലാളികൾക്ക് പണിസ്ഥലങ്ങളിൽ സുരക്ഷാ സംവിധാനങ്ങൾ ഒരുക്കിയില്ലെങ്കിൽ അധികൃതരുടെ അടുത്ത് നേരിട്ട് പരാതിപ്പെടാം. മന്ത്രാലയത്തിന്റെ കോൾ സെന്റർ നമ്പറായ 600590000 എന്ന നമ്പറിൽ വിളിച്ചോ മൊബൈൽ ആപ്, വെബ് സൈറ്റ്, സമൂഹമാധ്യമ പേജുകൾ എന്നിവയിലൂടെയോ പരാതി നൽകാം.
