റിലീസ് ചെയ്ത് മാസങ്ങൾ പിന്നിട്ടെങ്കിലും തിയേറ്ററിൽ ഹിറ്റായി മുന്നേറുകയാണ് ബ്ലെസി-പൃഥ്വിരാജ് കൂട്ടുകെട്ടിൽ പിറന്ന ആടുജീവിതം. 100 തിയേറ്ററുകളിൽ 50 ദിവസം പിന്നിട്ടിരിക്കുകയാണ് ചിത്രമിപ്പോൾ. അതിവേഗം 100 കോടി ക്ലബ്ബിൽ ഇടം നേടിയ മലയാള സിനിമ എന്ന നേട്ടം നേരത്തേ കരസ്ഥമാക്കിയ ആടുജീവിതം ഇപ്പോൾ മലയാള സിനിമയിലെത്തന്നെ ഏറ്റവും കൂടുതൽ പണം വാരിയ ചിത്രങ്ങളിൽ ഒന്നായിമാറിയിരിക്കുകയാണ്.
ബ്ലെസിയും പൃഥ്വിരാജും ചേർന്ന് പടുത്തുയർത്തിയത് വൻ വിജയമാണെന്നാണ് പ്രേക്ഷകരുടെ അഭിപ്രായം. നിരൂപകപ്രശംസയും പ്രേക്ഷകപ്രശംസയും ബോക്‌സ് ഓഫീസ് വിജയവും ഒരേപോലെ കൈവരിക്കാൻ കഴിഞ്ഞ ചുരുക്കം ചിത്രങ്ങളിലൊന്നായി മാറിയിരിക്കുകയാണ് ആടുജീവിതം. ചിത്രവുമായി ബന്ധപ്പെട്ട് ഇരുവരും നടത്തിയ 16 വർഷത്തെ പ്രവർത്തനങ്ങളാണ് വിജയം കണ്ടിരിക്കുന്നത്. ഏറ്റവുമധികം നാളുകൾ നീണ്ടുപോയ സിനിമയുടെ ഷൂട്ടിങ് കഴിഞ്ഞ വർഷം ജൂലൈ 14നായിരുന്നു പൂർത്തിയായത്.
പൃഥ്വിരാജ് എന്ന നടന്റെ കരിയറിലെ തന്നെ ഏറ്റവും വലിയ സിനിമയാണ് ആടുജീവിതം. ഓസ്‌കർ അവാർഡ് ജേതാക്കളായ എ.ആർ റഹ്‌മാൻ സംഗീതവും റസൂൽ പൂക്കുട്ടി ശബ്ദമിശ്രണവും നിർവഹിച്ചിരിക്കുന്ന ചിത്രത്തിൽ അമല പോളാണ് നായിക. വരും ദിവസങ്ങളിലും തിയേറ്ററുകളിൽ ആടുജീവിതത്തിന്റെ ടിക്കറ്റുകൾ ബുക്കിങ്ങാണ്.
