സിപിഐഎമ്മിൻ്റെ സമുന്നതനായ നേതാവ് കോടിയേരി ബാലകൃഷ്ണന് കണ്ണീരോടെ വിടചൊല്ലി കേരളം. പൂർണ ഔദ്യോഗിക ബഹുമതികളോടെ പയ്യാമ്പലത്ത് മൃതദേഹം സംസ്‍ക്കരിക്കുമ്പോൾ ജനസാഗരത്തിൻ്റെ മുദ്രാവാക്യം വിളികളാൽ പയ്യാമ്പലം ബീച്ച് മുഖരിതമായിരുന്നു. മുൻ മുഖ്യമന്ത്രി ഇ കെ നായനാരുടെയും ചടയൻ ഗോവിന്ദന്‍റെയും സ്മൃതി കുടീരങ്ങള്‍ക്ക് നടുവിലായാണ് കോടിയേരിയുടെ ചിതയൊരുക്കിയത്. കുടുംബാഗങ്ങൾക്കും 12 നേതാക്കൾക്കും മാത്രമായിരുന്നു പയ്യാമ്പലത്ത് സംസ്‍ക്കാരം നടക്കുന്ന സ്ഥലത്തേക്ക് പ്രവേശനമുണ്ടായിരുന്നത്. പാർട്ടി പ്രവര്‍ത്തകർ തൊണ്ടപൊട്ടുമാറുച്ചത്തിൽ മുദ്രാവാക്യം വിളിച്ചു.
മൃതദേഹം പൊതുദര്‍ശനത്തിന് വച്ചിരുന്ന അഴീക്കോടന്‍ മന്ദിരത്തില്‍ നിന്ന് പയ്യാമ്പലത്തേക്കുള്ള വിലാപയാത്രയില്‍ കാല്‍നടയായി മുഖ്യമന്ത്രിയുടെ നേതൃത്വത്തില്‍ എം എ ബേബി, എം വി ഗോവിന്ദൻ, എം വിജയരാജൻ, വിജയരാഘവൻ, കെ കെ ശൈലജ, പി കെ ശ്രീമതി അടക്കമുളള മുതിർന്ന നേതാക്കൾ വിലാപയാത്രയെ അനുഗമിച്ചു. മുഖ്യമന്ത്രിയും യെച്ചൂരിയും കോടിയേരിയുടെ ഭൌതികദേഹം വിലാപയാത്ര പയ്യാമ്പലത്തേക്ക് എത്തുമ്പോൾ ചുമലിലേറ്റിയത് ഏറെ വികാരഭരിതമായ കാഴ്ചയായിരുന്നു.
തങ്ങളുടെ പ്രിയപ്പെട്ട നേതാവിനെ അവസാനമായി ഒരു നോക്ക് കാണാനും അന്ത്യാഭിവാദ്യം അർപ്പിക്കാനുമായി തലശ്ശേരി ടൌൺ ഹാളിലും കണ്ണൂരിലെ വീട്ടിലും ജില്ലാകമ്മിറ്റി ഓഫീസിലും എത്തിച്ചേര്‍ന്നത് പതിനായിരങ്ങളാണ്. ഇന്നലെ എട്ട് മണിക്കൂറോളം തലശ്ശേരി ടൌൺ ഹാളിലും പിന്നീട് കുടുംബ വീട്ടിലും ഇന്ന് രാവിലെ മുതൽ കണ്ണൂർ ജില്ലാക്കമ്മറ്റി ഓഫീസിലും ആയിരുന്നു പൊതുദർശനം.
കോടിയേരി ബാലകൃഷ്ണൻ്റെ പ്രിയ പത്നി വിനോദിനിയും മക്കളും പൊട്ടിക്കരഞ്ഞു കൊണ്ടാണ് കോടിയേരിയെ യാത്രയാക്കിയത്. അവസാനം വരെ വിനോദിനിക്ക് താങ്ങായി മുഖ്യമന്ത്രിയുടെ പത്നി കമല കൈപിടിച്ച് ഒപ്പമുണ്ടായിരുന്നു.
