മലയാളത്തിൽ ഇതാ മറ്റൊരു ഹിറ്റ് കൂടി.. റിലീസിന് പിന്നാലെ മികച്ച പ്രേക്ഷക പ്രതികരണം നേടി തരംഗമാകാനൊരുങ്ങുകയാണ് പൃഥ്വിരാജ് – ബേസിൽ ജോസഫ് കൂട്ടുകെട്ടിൽ പിറന്ന ‘ഗുരുവായൂരമ്പലനടയിൽ’. വിപിൻദാസ് സംവിധാനം ചെയ്‌ത ചിത്രത്തിന് തിയേറ്ററിൽ മികച്ച പ്രതികരണമാണ് ലഭിച്ചുകൊണ്ടിരിക്കുന്നത്. ചിത്രത്തിൽ മുഴുനീളെ അവതരിപ്പിച്ചിരിക്കുന്ന സ്വാഭാവിക നർമ്മമാണ് സിനിമയുടെ പ്രധാന ആകർഷണമെന്നാണ് റിപ്പോർട്ടുകൾ വ്യക്തമാക്കുന്നത്.
ഒരു കല്യാണം നടക്കുന്നതുമായി ബന്ധപ്പെട്ട രസകരമായ മുഹൂർത്തങ്ങളിലൂടെ പ്രേക്ഷകരെ നയിക്കുന്ന ചിത്രം ഒരു കോമഡി എൻ്റർടെയ്നറാണ്. ബേസിൽ ജോസഫും ദർശനയും തകർത്തഭിനയിച്ച ജയ ജയ ജയ ജയ ഹേ എന്ന സൂപ്പർ ഹിറ്റ് ചിത്രത്തിന് ശേഷം വിപിൻ ദാസ് സംവിധാനം ചെയ്യുന്ന ചിത്രം കൂടിയാണ് ഗുരുവായൂരമ്പലനടയിൽ. കൂടാതെ, കുഞ്ഞിരാമായണത്തിന് ശേഷം ദീപു പ്രദീപ് രചന നിർവഹിക്കുന്ന ചിത്രവുമാണിത്. അതുകൊണ്ടുതന്നെ റിലീസിന് മുമ്പേ സിനിമ പ്രേക്ഷകരുടെ ഇടയിൽ ശ്രദ്ധ നേടിയിരുന്നു.
പൃഥ്വിരാജ് പ്രൊഡക്ഷൻസിൻ്റെ ബാനറിൽ സുപ്രിയ മേനോൻ, ഇഫോർ എന്റർടെയ്ൻമെൻ്റിൻ്റെ ബാനറിൽ മുകേഷ് ആർ. മേത്ത, സി.വി. സാരഥി എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. നിഖില വിമൽ, അനശ്വര രാജൻ, ജഗദീഷ്, രേഖ, ഇർഷാദ്, തമിഴ് നടൻ യോഗി ബാബു തുടങ്ങിയവരും ചിത്രത്തിൽ പ്രധാന വേഷത്തിൽ എത്തുന്നുണ്ട്.
