നിരാലംബരുടെ കൈത്താങ്ങായി ആതുരസേവനരംഗത്ത് നിറസാന്നിദ്ധ്യമായിരുന്ന വ്യക്തിത്വം, ബിലീവേഴ്സ് ഈസ്റ്റേൺ ചർച്ച് അധ്യക്ഷൻ കെ പി യോഹന്നാൻ അന്തരിച്ചു. അമേരിക്കയിൽ വച്ച് പ്രഭാത നടത്തത്തിനിടെ വാഹനം ഇടിച്ച് പരിക്കേറ്റ് ചികിത്സയിലിരിക്കെയാണ് അദ്ദേഹം വിടവാങ്ങിയത്.
അപ്പർ കുട്ടനാട്ടിലെ നിരണത്ത് സാധാരണ കർഷക കുടുംബത്തിൽ ജനിച്ച കെ പി യോഹന്നാൻ കൗമാരകാലത്ത് തന്നെ ബൈബിൾ പ്രഘോഷണത്തിൽ കൂടുതൽ ആഗ്രഹം പ്രകടിപ്പിച്ചു. 16-ാ മത്തെ വയസിൽ ഓപ്പറേഷൻ മൊബിലൈസേഷൻ എന്ന സംഘടനയുടെ ഭാഗമായി യോഹന്നാൻ എന്ന കുട്ടി പ്രവർത്തിക്കാൻ തുടങ്ങി. 1974 ൽ അമേരിക്കയിലെ ഡാലസ്സിൽ ദൈവശാസ്ത്രപഠനത്തിന് ചേർന്നു. പാസ്റ്ററായി ദൈവവചനം പ്രചരിപ്പിച്ച് പിന്നീട് വൈദിക ജീവിതത്തിലേക്ക്. ഇതേമേഖലയിൽ സജീവമായിരുന്ന ജർമൻ പൗര ഗിസല്ലയെ പിന്നീട് ജീവിതപങ്കാളിയാക്കുകയും ചെയ്തു. 1978 ൽ ഭാര്യയുമായി ചേ‍ർന്ന് തുടങ്ങിയ ഗോസ്പൽ ഫോർ ഏഷ്യ എന്ന സ്ഥാപനം പിന്നീടുള്ള ജീവിതത്തിലെ വലിയ വഴിത്തിരിവായി. അതിവേഗമായിരുന്നു സംഘടനയുടെ വളർച്ച. ഇതോടെ നീണ്ട വിദേശവാസത്തിനു ശേഷം തിരുവല്ല ആസ്ഥാനമായി പ്രവർത്തിക്കാൻ യോഹന്നാൻ തീരുമാനമെടുത്തു.
ലോകമെമ്പാടുമുള്ള വിശ്വാസസമൂഹത്തെ ചേർത്തുനിർത്തിക്കൊണ്ട് 2003 ൽ ബീലീവേഴ്സ് ചർച്ച എന്ന സഭയ്ക്ക് അദ്ദേഹം രൂപം നൽകി. ആതുരവേസന രംഗത്ത് വേറിട്ട സാന്നിദ്ധ്യമായി സഭ മാറി. ചുരുങ്ങിയ ചിലവിൽ സാധാരണക്കാരന് ചികിത്സ ഉറപ്പാക്കാൻ തിരുവല്ലയിൽ മെഡിക്കൽ കോളേജും അദ്ദേഹം തുടങ്ങി. ഇന്ത്യയിലുടനീളം സഭ കാരുണ്യ പ്രവർത്തനങ്ങൾ ഏറ്റെടുത്തുകൊണ്ട് പട്ടിണിപ്പാവങ്ങളുടെയും ദുരിതമനുഭവിക്കുന്നവരുടെയും ദൈവമായിമാറി. ദുരന്തമുഖങ്ങളിൽ കാരുണ്യ സ്പർശമായി കെ പി യോഹന്നാൻ നിലകൊണ്ടു. 2017 ൽ ബിലീവേഴ്സ് ഈസ്റ്റേൺ ചർച്ച് എന്ന് പേര് മാറുമ്പോൾ ലോകമെമ്പാടും വേരുകളുള്ള ക്രൈസ്തവ സഭയുടെ പ്രഥമ മെത്രാപ്പോലീത്ത സ്ഥാനം കെ പി യോഹന്നാനെ വിശ്വാസികൾ ഏൽപ്പിച്ചു. അത്തനാസിയസ് യോഹാൻ മെത്രാപ്പീലീത്തയ്ക്ക് കണ്ണീരോടെ വിട ചൊല്ലുന്നു. ദുരിതമനുഭവിക്കുന്നവരുടെ കൈപിടിക്കാനും കണ്ണീരൊപ്പാനും ഇനി കെപി യോഹന്നാൻ ഇല്ല, ആദരാജ്ഞലികൾ.
