കോവിഡ് എന്ന മഹാമാരിയ്ക്ക് മുന്നിൽ ലോകം പതറിയപ്പോൾ രക്ഷകർ എന്നോണം എത്തിയതായിരുന്നു കോവാക്സിനും കോവിഷീൽഡും. വാക്‌സിനേഷൻ നടത്തിയവർക്ക് രോഗം ബാധിക്കില്ല എന്ന ആത്മവിശ്വാസത്തിൽ പലരും കുത്തിവയ്പ്പ് നടത്താൻ ആശുപത്രികളിൽ ക്യൂ നിന്നു. എന്നാൽ ഈയിടെ കോവിഷീല്‍ഡ് വാക്സീന്‍ കുത്തിവയ്പ്പ് എടുത്തവർക്ക് ഗുരുതരമായ പാർശ്വഫലങ്ങൾ ഉണ്ടായേക്കാം എന്ന വാർത്ത വാക്സിൻ എടുത്തവരെ ഒന്നാകെ ഞെട്ടിക്കുകയാണുണ്ടായത്. വാക്‌സിന്റെ നിർമാതാക്കൾ തന്നെയായിരുന്നു ഇക്കാര്യം വെളിപ്പെടുത്തിയത്. ഇതോടെ പലരും ആശങ്കയിലാണിപ്പോൾ.
വിവാദങ്ങൾ നിലനിൽക്കുന്ന സാഹചര്യത്തിൽ കോവിഡ് വാക്സിൻ സര്‍ട്ടിഫിക്കറ്റില്‍ നിന്ന് പ്രധാനമന്ത്രി നരേന്ദ്ര മോദിയുടെ ചിത്രം നീക്കിയതും ചർച്ചയാവുകയാണ്. തെരഞ്ഞെടുപ്പ് പെരുമാറ്റച്ചട്ടത്തിന്റെ ഭാഗമായാണ് ചിത്രം നീക്കം ചെയ്തത് എന്നാണ് ഔദ്യോഗിക വൃത്തങ്ങൾ നൽകുന്ന വിശദീകരണം. നേരത്തെ കോവിഡ് സർട്ടിഫിക്കറ്റിൽ മോദി ചിത്രം നൽകുന്നതിനെതിരെ വലിയ പ്രതിഷേധവും വിമർശനവും ഉയർന്നിരുന്നുവെങ്കിലും കേന്ദ്ര സർക്കാർ ഇത് അപ്പാടെ തള്ളിക്കളയുകയായിരുന്നു.
കൊവിഷീൽഡ് വാക്സിനെടുത്ത അപൂർവ്വം ചിലരിൽ രക്തം കട്ടപിടിക്കുകയും, പ്ലേറ്റ്ലെറ്റ് കൗണ്ട് കുറയ്ക്കുകയും ചെയ്യുന്ന ടിടിഎസ് എന്ന അവസ്ഥയുണ്ടാകാമെന്നാണ് ആസ്ട്രസെനെക കമ്പനി യു.കെയിലെ കോടതിയെ അറിയിച്ചിരുന്നു. ഇതിന്റെ അടിസ്ഥാനത്തിലാണ് സർട്ടിഫിക്കറ്റിൽ നിന്നും മോദിയുടെ പടം നീക്കിയതെന്നും പറയപ്പെടുന്നു. അതേസമയം, കോവിഷീൽഡ് വാക്സീൻ സ്വീകരിച്ച ശേഷം ഹൃദയാഘാതം വന്ന് മരിച്ചവരുടെ കുടുംബങ്ങൾക്ക് കേന്ദ്രസർക്കാർ നഷ്ടപരിഹാരം നൽകണമെന്ന് കോൺഗ്രസ് ആവശ്യപ്പെട്ടു. എന്തായാലും വാക്സിൻ സ്വീകരിച്ചവർ എന്ത് ചെയ്യണമെന്നറിയാതെ ആകെ കുഴപ്പത്തിലാണ്.
