യുഎഇയിൽ മഴ പെയ്യുമെന്ന മുന്നറിയിപ്പ് മണിക്കൂറുകൾ മുൻപ് വന്നതിന് പിന്നാലെ ഇടിച്ചുകുത്തി മഴ പെയ്തു. മഴയ്ക്ക് ആക്കം കൂട്ടി ആലിപ്പഴ വർഷവും ഉണ്ടായി. ഷാർജ, അജ്മാൻ, റാസൽ ഖൈമ,ഫുജൈറ എന്നിവിടങ്ങളിലാണ് കനത്ത മഴയും ആലിപ്പഴ വർഷവും റിപ്പോർട്ട് ചെയ്തത്. പലയിടങ്ങളിലും കനത്ത മഴ പെയ്തതിനാൽ വാഹനവുമായി യാത്ര ചെയ്തവർ ഏറെ ബുദ്ധിമുട്ടിലായി.
മഴ ശക്തമാവാൻ ഉള്ള സാധ്യതയുള്ളതിനാൽ കൂടുതൽ മുൻകരുതൽ എടുക്കാനും യുഎഇയുടെ കാലാവസ്ഥാ വകുപ്പ് ജനങ്ങളോട് നിർദ്ദേശിച്ചിട്ടുണ്ട്. ശക്തമായ കാറ്റ് തിരശ്ചീന ദൃശ്യപരത കൂടുതൽ കുറച്ചേക്കാം. മാത്രമല്ല, വെള്ളപ്പൊക്ക സാധ്യതയുള്ള സ്ഥലങ്ങളിൽ നിന്നും സുരക്ഷ ഉറപ്പാക്കാൻ മഴവെള്ളം അടിഞ്ഞുകൂടുന്ന സ്ഥലങ്ങളിൽ നിന്നും വിട്ടുനിന്നാൽ ആപത്ത് ഒഴിവാക്കാൻ കഴിയുമെന്നും അതോറിറ്റി അറിയിച്ചു.
