യുഎഇയിൽ പൊതുസ്ഥലത്ത് മാസ്ക് ധരിക്കണമെന്ന് ഇനി നിർബന്ധമില്ലെന്ന് യുഎഇ ദുരന്തനിവാരണ അതോറിറ്റി. കൊവിഡ് നിയന്ത്രണങ്ങളിൽ കൂടുതൽ ഇളവുകൾ പ്രഖ്യാപിച്ചു. രണ്ടര വർഷത്തിന് ശേഷമാണ് ഇളവുകൾ വരുന്നത്. നാഷണൽ എമർജൻസി ക്രൈസിസ് ആൻഡ് ഡിസാസ്റ്റർ മാനേജ്‌മെന്റ് അതോറിറ്റി (എൻസെമ)യുടെ ഇളവുകൾ നിലവിൽ അബുദാബിക്ക് മാത്രമാണ് ബാധകം. മറ്റ് എമിറേറ്റുകളിൽ ഇളവുകൾ ബാധകമായിരിക്കില്ല.
പൊതുജനങ്ങൾക്ക് ഇനി മാസ്ക് ധരിക്കാതെ മാളുകൾ, സൂപ്പർമാർക്കറ്റുകൾ, ഹോട്ടലുകൾ, ബാറുകൾ, റെസ്റ്റോറൻ്റുകൾ എന്നിവയിൽ പ്രവേശിക്കാം. അതേസമയം സെപ്റ്റംബർ 28 ബുധനാഴ്ച മുതൽ ആരാധനാലയങ്ങളിലും ആശുപത്രികളിലും പൊതുഗതാഗത സംവിധാനങ്ങളിലും ആളുകൾ മാസ്ക് ധരിച്ചിരിക്കണമെന്നാണ് നിർദേശം.
മറ്റ് പ്രധാന ഇളവുകൾ:
സ്കൂളുകളിൽ അധ്യാപകരോ വിദ്യാർത്ഥികളോ മുഖംമൂടി ധരിക്കേണ്ടതില്ല.
യാത്രക്കാർക്ക് മാസ്കുകൾ വേണോയെന്ന് എയർലൈനുകൾക്ക് തീരുമാനിക്കാം.
അബുദാബി നിവാസികൾ അൽ ഹോസ്‌ൻ ആപ്പിലെ സ്റ്റാറ്റസ് ഗ്രീൻ ആക്കി നിലനിർത്താൻ ഇനി 30 ദിവസത്തിലൊരിക്കൽ പരിശോധനകൾ നടത്തിയാൽ മതിയാകും.
കോവിഡ് -19 പോസിറ്റീവ് ആയ വ്യക്തി മാത്രം ക്വാറൻ്റീനിൽ പോയാൽ മതിയാകും.അവരുമായി സമ്പർക്കം ഉണ്ടായവർക്ക് ക്വാറൻ്റൈൻ ആവശ്യമില്ല.
ആരാധനാലയങ്ങളിൽ സാമൂഹിക അകലം ഇനി ബാധകമല്ല.
പ്രതിദിന കോവിഡ് കേസുകളുടെ കണക്ക് സർക്കാർ ഇനി പ്രസിദ്ധീകരിക്കില്ല.
