ഒടുവിൽ ആരാധകരുടെ കാത്തിരിപ്പിന് വിരാമമിട്ട് അല്ലു അർജുൻ ചിത്രം ‘പുഷ്പ 2’-വിന്റെ ടീസർ എത്തി. പുതിയ അവതാരത്തിലാണ് അല്ലു അർജുൻ ടീസറിൽ പ്രത്യക്ഷപ്പെട്ടിരിക്കുന്നത്. അല്ലു അർജുൻ്റെ പിറന്നാൾ ദിവസമായ ഇന്നാണ് മാസ് ടീസർ ജനങ്ങളിലേയ്ക്ക് എത്തിച്ചത്. റിലീസ് ചെയ്ത് മണിക്കൂറുകൾക്കകം ടീസർ സാമൂഹ്യമാധ്യമങ്ങളിൽ തരംഗമാകുകയും ചെയ്തു.
സിനിമയുടെ പുതിയ പോസ്റ്റർ കഴിഞ്ഞ ദിവസം അണിയറ പ്രവർത്തകർ പുറത്തുവിട്ടിരുന്നു. ചിലങ്കയണിഞ്ഞ അല്ലുവിന്റെ കാൽപാദങ്ങളാണ് പോസ്റ്ററിലുണ്ടായിരുന്നത്. അതുകൊണ്ടുതന്നെ ആരാധകർ ടീസറിലെ താരത്തിന്റെ ലുക്കിനായി കാത്തിരിക്കുകയായിരുന്നു. സംവിധായകൻ സുകുമാറും മൈത്രി മൂവി മേക്കേർസും ചേർന്നാണ് പുഷ്പ 2 നിർമ്മിക്കുന്നത്. 2024 ഓഗഗസ്റ്റ് 15നാണ് ചിത്രം തിയേറ്ററുകളിലെത്തുക. 2021ൽ പുറത്തിറങ്ങിയ ‘പുഷ്പ; ദ റൈസ്’ൽ പുഷ്പരാജായി എത്തിയ അല്ലു അർജുൻ കരിയറിലെ മികച്ച പ്രകടനമാണ് കാഴ്‌ചവെച്ചത്.
ചിത്രത്തിലെ മാസ് ഡയലോഗുകളും ഗാനങ്ങളും സിനിമാപ്രേമികൾ വലിയരീതിയിൽ ആഘോഷമാക്കിയിരുന്നു. ഒന്നാം ഭാഗത്തിൽ ഐ.പി.എസ് ഉദ്യോഗസ്ഥനായ ബൻവാർ സിങ് ഷെഖാവത്ത് ആയി കൈയടി വാങ്ങിയ ഫഹദ് രണ്ടാം ഭാഗത്തിലും ഗംഭീര പ്രകടനം കാഴ്‌ചവയ്ക്കുമെന്നാണ് ആരാധകരുടെ പ്രതീക്ഷ. രശ്മിക മന്ദാനയായിരുന്നു നായിക. പുഷ്പ 2 റിലീസ് ചെയ്യുന്നതോടെ അല്ലു അർജുന്റെ പ്രശസ്തി കൂടുതൽ വർധിക്കുമെന്നാണ് സിനിമാ ലോകം വിലയിരുത്തുന്നത്.
