ചെറിയ പെരുന്നാളിന്റെ സുദിനങ്ങളിൽ വർണശബളമായ ആഘോഷരാവുകൾ ഒരുക്കാൻ ഇത്റ. ‘ആനന്ദത്തോടെ പൂക്കുന്നു’ എന്ന ടാഗ്‌ലൈനിലാണ് കിങ് അബ്ദുൽ അസീസ് ലോക സാംസ്കാരിക കേന്ദ്രമായ അൽ ഖോബാറിലെ ‘ഇത്റ’ ആഘോഷ പരിപാടികൾ അരങ്ങേറുക. ഈ മാസം 11മുതൽ13 വരെ കേന്ദ്രം കുടുംബങ്ങൾക്കും കുട്ടികൾക്കും മുതിർന്നവർക്കും വേണ്ടി വിനോദവും വിജ്ഞാനവും സമ്മിശ്രമാക്കിയുള്ള നിരവധി പരിപാടികൾ ഒരുക്കും. വൈകുന്നേരം നാല് മണി മുതൽ രാത്രി11.30 വരെയാണ് ‘ഇത്റ’ പ്രവർത്തന സജ്ജമാവുക.
ചോക്ലേറ്റ് ഇഷ്ടപ്പെടുന്നവർക്ക് ഇത്റയിലെ പ്ലാസ ഏരിയയിൽ രാത്രി11വരെ ചോക്ലേറ്റിന്റെ രുചി നുണയാനുള്ള അവസരമുണ്ട്. പാൽ, വെള്ള ചോക്ലേറ്റ് എന്നിവ ഉപയോഗിച്ച് നിർമിക്കുന്ന ചോക്ലേറ്റ് വിഭവങ്ങൾ ലഭിക്കുന്ന ഒരു സ്റ്റാളും ഇവിടെ സജ്ജീകരിക്കുന്നുണ്ട്. പങ്കെടുക്കുന്നവർക്ക് സ്വന്തം ചോക്ലറ്റ് ബാർ നിർമിക്കാനുള്ള സുവർണ്ണാവസരവും സന്ദർശകർക്ക് ലഭിക്കും. മൂന്ന് രാത്രികളിലുമായി തത്സമയ സംഗീതത്തിന് ഇത്റ വേദിയാവും. മാത്രമല്ല, ലൈബ്രറിയിലെ എക്സിബിഷൻ ഏരിയയിൽ പെരുന്നാളിനെ അടിസ്ഥാനമാക്കി കഥപറച്ചിൽ പരിപാടിയും അരങ്ങേറുന്നുണ്ട്. ഇത്റയുടെ ഈദിൽ ഞങ്ങൾ കഥകളിലൂടെ സന്തോഷം പങ്കിടുകയും പുതിയ കഥാപാത്രങ്ങളെ കണ്ടുമുട്ടുകയും മൂല്യങ്ങൾ നേടുകയും ചോദ്യങ്ങൾക്ക് ഉത്തരം നൽകുകയും ചെയ്യുമെന്ന് അധികൃതർ പ്രസ്താവനയിൽ അറിയിച്ചു.
കേന്ദ്രത്തിലെ ലഷ് ഗാർഡന് പുറത്ത് സന്ദർശകരുടെ സംശയങ്ങൾ പരിഹരിക്കാൻ മുഖാമുഖം പരിപാടിയും സംഘടിപ്പിക്കുന്നുണ്ട്. എനർജി എക്‌സിബിറ്റിൽ ചോദ്യങ്ങൾക്ക് ഉത്തരം നൽകാൻ വിദഗ്ധർ ആയിരിക്കും അണിനിരക്കുക. എല്ലാ ദിവസവും വൈകുന്നേരം 4.30ന് സലീഗ്, റാഡിമ, അൽറൂഫിയ എന്നീ മൂന്ന് ഹ്രസ്വസിനിമകൾ ഇത്റയിലെ തിയറ്ററുകളിൽ പ്രദർശിപ്പിക്കും.രാത്രി എട്ടിന് സൗദി കേന്ദ്രീകൃതമായ കഥ പറയുന്ന ഇത്ഹയുടെ സ്വന്തം സിനിമ ‘വാലി റോഡ്’ പ്രദർശിപ്പിക്കും. അറബിയിൽ ഇംഗ്ലീഷ് സബ്‌ടൈറ്റിലുകളോടെയായിരിക്കും പ്രദർശനം. ഒട്ടുമിക്ക പരിപാടികളും ആളുകൾക്ക് സൗജന്യമായി ആസ്വദിക്കാമെന്നത് പെരുന്നാൾ ദിനങ്ങളുടെ മാറ്റ് കൂട്ടും. എന്നാൽ തിരഞ്ഞെടുത്ത ഇവൻറുകൾ ആസ്വദിക്കാൻ ടിക്കറ്റ് നേടണമെന്ന നിബന്ധനയുമുണ്ട്. ‘ഈദ് എറൗണ്ട് ദി വേൾഡ് പ്രോഗ്രാം’ ആഗോളവും പ്രാദേശികവുമായ ഈദ് പാരമ്പര്യങ്ങളും ആചാരങ്ങളും ജനങ്ങളിലെത്തിക്കുന്നതും പരിപാടിയുടെ ലക്ഷ്യമാണ്. എനർജി എക്‌സിബിറ്റ് ‘സന്തോഷത്തിന്റെ ഗ്രാമം’ എന്ന പേരിൽ ഒരു തത്സമയ കുടുംബനാടകവും ഇത്റയിൽ അരങ്ങേറും. ഈദ് രാവുകളിൽ ഇത്റ തിയറ്ററിൽ ‘ഹികായത്ത് ഫറ വിത്ത് ചൊറോള’ എന്ന നാടകത്തിന്റെ രണ്ട് തത്സമയ പ്രകടനങ്ങൾ നടക്കും. ഒരു മണിക്കൂറുള്ള ആദ്യ ഷോ 6.30ന് ആണ് ആരംഭിക്കുക. അടുത്ത ഷോ രാത്രി 8.30 നും അരങ്ങേറും. ഇത്റ അംഗങ്ങൾക്ക് കിഴിവോടെ പരിപാടി ദിവസം അവിടെ നിന്ന് ടിക്കറ്റുകൾ വാങ്ങാനുള്ള അവസരമുണ്ട്.
