ബെന്യാമിന്റെ ആടുജീവിതം പുറത്തിറങ്ങിയതു മുതൽ മലയാളികൾക്ക് പരിചിതമാണ് നജീബിനെ. നജീബിന്റെ ജീവിതം ആടുജീവിതമായി തന്നെ വെള്ളിത്തിരയിൽ എത്തിയപ്പോൾ അദ്ദേഹത്തോടുള്ള സ്നേഹവും ഇഷ്ടവും ഒരുപടികൂടി കൂടി മലയാളികൾക്ക്.
സിനിമ ബോക്സ് ഓഫീസ് റെക്കോർഡുകൾ സൃഷ്ടിക്കുമ്പോൾ തന്നെ പലരും ചോദിക്കുന്ന ചോദ്യമാണ് , നജീബിന്റെ ജീവിതം വെള്ളിത്തിരയിൽ എത്തിച്ച് കോടികൾ വാരുമ്പോൾ നജീബിന് എന്ത് നൽകി എന്ന്? ഇപ്പോഴിതാ ഇക്കാര്യത്തിൽ വ്യക്തത വരുത്തിയിരിക്കുകയാണ് സംവിധായകൻ ബ്ലെസി. അദ്ദേഹത്തിന്റെ വാക്കുകൾ ഇങ്ങനെയാണ്.
“നമുക്കൊപ്പം സഞ്ചരിക്കുന്ന ആളായിട്ട് ആണ് ഞങ്ങൾക്ക് നജീബിനെ തോന്നിയിട്ടുള്ളത്. ആൾക്കാർ പറഞ്ഞ് പറഞ്ഞ് മോശമാക്കുന്നു എന്നതല്ലാതെ അദ്ദേഹത്തിന്റെ സ്വസ്ഥമായ ജീവിതത്തിന് വേണ്ട എല്ലാ സാഹചര്യവും നമ്മൾ ഒരുക്കി കൊടുത്തിട്ടുണ്ട്. ഒരു വർഷത്തിന് മുൻപെ തന്നെ ഒരു ജോലി നമ്മൾ ഓഫർ ചെയ്തിരുന്നു. പക്ഷേ അദ്ദേഹം വേണ്ടെന്ന് പറഞ്ഞു. ഇതിനോടകം പലരും പല ചോദ്യങ്ങളും ചോദിക്കുന്നുണ്ട്. അതുകൊണ്ട് മാത്രം പറയാം. ഞാൻ ബെന്യാമിന് കൊടുത്തതിന്റെ പത്ത് ഇരട്ടി തുക നജീബിന്റേൽ എത്തിയിട്ടുണ്ട്. ഞാൻ പോലും കഴിഞ്ഞ ദിവസം ആണ് അറിയുന്നത്. നമ്മുടെ ഇടയിൽ പോലും അത് ആര് കൊടുത്തു എന്ന് ചർച്ച ചെയ്യുന്നില്ല. ഒരിക്കലും ആർക്കും ആശങ്ക വേണ്ട”, എന്നാണ് ബ്ലെസി പറഞ്ഞത്.
