ജനപ്രിയമായ ബിഗ് ടിക്കറ്റിന്റെ നറുക്കെടുപ്പ് ഇന്ന് മുതൽ താൽക്കാലികമായി നിർത്തിവെച്ചു. യുഎഇ റെഗുലേറ്ററി ഗെയിമിംഗ് ആവശ്യകതകൾക്ക് അനുസരിച്ചാണ് തീരുമാനം. എന്നാൽ ഈ മാസത്തെ നറുക്കെടുപ്പ് ഏപ്രിൽ 3 ബുധനാഴ്ച നടത്തപ്പെടുമെന്ന് അധികൃതർ വ്യക്തമാക്കി. സീരീസ് 262-ൻ്റെ തത്സമയ നറുക്കെടുപ്പാണ് ബുധനാഴ്ച നടക്കുക. 10 മില്യൺ ദിർഹത്തിൻ്റെ ഗാരന്റി ഗ്രാന്റ് പ്രൈസ് ഉൾപ്പെടെയുള്ള എല്ലാ സമ്മാനങ്ങളും നൽകുമെന്നും അധികൃതർ അറിയിച്ചു.
അബുദാബി അന്താരാഷ്ട്ര വിമാനത്താവളത്തിൽ എല്ലാ മാസവും 3-ാം തിയതിയാണ് ബിഗ് ടിക്കറ്റ് നറുക്കെടുപ്പ് നടത്തിവരുന്നത്. ബിഗ് ടിക്കറ്റ് കഴിഞ്ഞ വർഷം മൊത്തം 24,62,97,071 ദിർഹം സമ്മാനങ്ങളാണ് വിതരണം ചെയ്തത്. നറുക്കെടുപ്പ് നിർത്തിവെക്കുമെങ്കിലും ബിഗ് ടിക്കറ്റുമായി ബന്ധപ്പെട്ട വിവരങ്ങൾ യഥാസമയം ജനങ്ങളെ അറിയിക്കുമെന്നും അധികം വൈകാതെ തിരിച്ചുവരുമെന്നാണ് കരുതുന്നതെന്നും അധികൃതർ വ്യക്തമാക്കി.
പ്രവർത്തനം അവസാനിപ്പിച്ച യുഎഇയിലെ മൂന്നാമത്തെ പ്രധാന റാഫിൾ ഡ്രോ ഓപ്പറേറ്ററാണ് ബിഗ് ടിക്കറ്റ്. ഈ വർഷം ജനുവരി 1 മുതൽ ദുബായ് ആസ്ഥാനമായുള്ള മഹ്‌സൂസും എമിറേറ്റ്‌സ് ഡ്രോയും പ്രവർത്തനങ്ങൾ നിർത്തിവെച്ചിരുന്നു. ഇവ എപ്പോഴാണ് പുനരാരംഭിക്കുക എന്നത് സംബന്ധിച്ച തീരുമാനങ്ങളൊന്നും ഇവരുവരെ ലഭിച്ചിട്ടില്ല.
