ഇന്ത്യൻ വനിതാ ക്രിക്കറ്റ്‌ ടീം ക്യാപ്റ്റൻ മിതാലി രാജിന്റെ ബയോപിക്ക് ആയ ‘സബാഷ് മിത്തു’ ജൂലൈ 15ന് തിയറ്ററുകളിലെത്തും. മിതാലി രാജായി വേഷമിടുന്ന താരം തപ്സി പന്നുവാണ് ട്വിറ്ററിലൂടെ റിലീസ് തീയതി പങ്കുവെച്ചത്. ഫെബ്രുവരി നാലിന് റിലീസ് ചെയ്യാൻ തീരുമാനിച്ചെങ്കിലും പിന്നീട് മാറ്റുകയായിരുന്നു.
ബയോപിക്ക് സംവിധാനം ചെയ്യുന്നത് ശ്രീജിത് മുഖർജിയാണ്. തപ്സിക്കൊപ്പം വിജയ് റാസും ചിത്രത്തിൽ കേന്ദ്ര കഥാപാത്രത്തെ അവതരിപ്പിക്കുന്നു. തിരക്കഥ പ്രിയ ആവെൻ ആണ്. ക്യാമറ സിർഷ റേ. എഡിറ്റ് ശ്രീകർ പ്രസാദ്. സംഗീതം അമിത് ത്രിവേദി. സൗണ്ട് ഡിസൈൻ ഓസ്കർ ജേതാവ് റസൂൽ പൂക്കുട്ടി.
അന്താരാഷ്ട്ര ക്രിക്കറ്റിൽ 20 വർഷം പൂർത്തിയാക്കുന്ന ആദ്യത്തെ വനിതാ ക്രിക്കറ്റ്‌ താരം എന്ന നേട്ടം സ്വന്തമാക്കിയ താരമാണ് മിതാലി രാജ്. രാജ്യാന്തര ക്രിക്കറ്റിൽ ഏറ്റവുമധികം റൺസ് നേടിയ വനിതാ താരവും മിതാലിയാണ്.
