മണിക്കൂറുകൾ നീണ്ട അന്വേഷണങ്ങൾക്കൊടുവിൽ ഷാർജയിൽ നിന്ന് കാണാതായ ഫ്രഞ്ച് കൗമാരക്കാരിയെ കണ്ടെത്തി. ഷാർജ ഗ്രാൻഡ് മോസ്‌കിന് സമീപത്തെ വീട്ടിൽ നിന്ന് കാണാതായ മെലിൻ എന്ന 17കാരിയെയാണ് ഇന്ന് ഉച്ചയോടെ പൊലീസ് കണ്ടെത്തിയത്. 36 മണിക്കൂർ നീണ്ട അന്വേഷണത്തിനൊടുവിലാണ് മെലിനെ സുരക്ഷിതയായി കണ്ടെത്തിയത്.
വീടിന് സമീപം വെച്ച് കണ്ടെത്തിയ പെൺകുട്ടിയെ വൈദ്യപരിശോധനയ്ക്കായി ആശുപത്രിയിലേക്ക് മാറ്റിയതായി ഷാർജ പൊലീസ് അറിയിച്ചു. മാർച്ച് 25 തിങ്കളാഴ്ച പുലർച്ചെ 1 മണിക്കും 5 മണിക്കും ഇടയിൽ അൽ റിഖൈബയിലെ അൽ സുയോഹ് സബർബിൽ നിന്നാണ് മെലിനെ കാണാതാകുന്നത്. ഇതോടെ കുടുംബം പലസ്ഥലങ്ങളിലും അന്വേഷിച്ചെങ്കിലും വിവരം ലഭിക്കാതെ വന്നതോടെ ഷാർജ പൊലീസിൽ അറിയിക്കുകയായിരുന്നു. ഇതോടെ പൊലീസ് സ്ഥലത്തെത്തി അന്വേഷണവും ആരംഭിച്ചു. അതോടൊപ്പം സാമൂഹ്യമാധ്യമങ്ങളിലും വ്യാപകമായി മെലിന്റെ ദൃശ്യങ്ങൾ പങ്കുവെച്ച് അന്വേഷണം നടത്തിവരുന്നുണ്ടായിരുന്നു.
വിവിധ സ്ഥലങ്ങളിലെ സിസിടിവി ദൃശ്യങ്ങൾ പരിശോധിച്ച പൊലീസ് ഡ്രോൺ ഉപയോഗിച്ചും അന്വേഷണം നടത്തുന്നതിനിടെയാണ് മെലിനെ കണ്ടെത്തിയത്. മണിക്കൂറുകൾ നീണ്ട തിരച്ചിലിനൊടുവിൽ മകളെ തിരിച്ചുകിട്ടിയതിന്റെ സന്തോഷത്തിലാണ് പിതാവ് ഡേവിഡ് ക്രോയിസറും കുടുംബവും.
