ലോകത്ത് ആദ്യമായി ഡിജിറ്റൽ ആസ്തി നിയമം നടപ്പിലാക്കി ദുബായ്. ദുബായ് ഇൻറർനാഷനൽ ഫിനാൻഷ്യൽ സെൻറർ (ഡി.ഐ.എഫ്.സി)യാണ് നിയമം നടപ്പിലാക്കിയത്. ഇനി ഫിനാൻഷ്യൽ സെൻററിലെ ഡിജിറ്റൽ ആസ്തി നിക്ഷേപകർക്കും ഉപയോക്താക്കൾക്കും നിയമപരമായ സംരക്ഷണവും ശക്തമായ ചട്ടക്കൂടും ലഭിക്കും.
കോടിക്കണക്കിന് ഡോളറിന്റെ മൂല്യമുള്ള ഡിജിറ്റൽ അസറ്റ് വ്യവസായം അതിവേഗം വളരുന്നതാണ്. ഭാവിയിൽ വലിയ സാധ്യതകളുള്ള മേഖലയാണ് ഡിജിറ്റൽ വ്യവസായം. ഈ സാഹചര്യത്തിലാണ് നിലവിൽ മേഖലയിൽ കൃത്യമായി നിയമം രൂപപ്പെടുത്തിയിരിക്കുന്നത്. നേരത്തെ ഡിജിറ്റൽ അസറ്റുകളുടെ നിയമപരമായ സ്വഭാവത്തെ കുറിച്ച് അവ്യക്തത നിലനിന്നിരുന്നു. അന്താരാഷ്ട്ര തലത്തിൽ ചില മാർഗനിർദേശങ്ങൾ നിലവിലുണ്ടായിരുന്നെങ്കിലും സമഗ്രമായ ഒരു ചട്ടക്കൂട് ഉണ്ടായിരുന്നില്ല.
വലിയ രീതിയിലുള്ള ഗവേഷണവും വിദഗ്ധരുടെ അഭിപ്രായങ്ങളും ശേഖരിച്ചതിന് ശേഷം ഡി.ഐ.എഫ്.സി നിയമപരമായ ചോദ്യങ്ങൾ കണ്ടെത്തുകയും അവ പരിഹരിക്കുന്നതിനുള്ള ഒരു ചട്ടക്കൂട് നിർമിക്കുകയും ചെയ്തിട്ടുണ്ട്. ഡിജിറ്റൽ ആസ്തികൾ സംബന്ധിച്ച് വ്യക്തമായി നിർവചിക്കുന്നതാണ് ഡി.ഐ.എഫ്.സി രൂപപ്പെടുത്തിയ പുതിയ നിയമം. നിയമം മാർച്ച് എട്ട് മുതലാണ് നിലവിൽ വന്നിട്ടുള്ളത്. ഡിജിറ്റൽ അസറ്റ് ലോ പ്രഖ്യാപിക്കുന്നത് വളരെ ആവേശപൂർവമാണ്. ഈ നിയമം മേഖലയിൽ വലിയ മാറ്റങ്ങൾക്ക് കാരണമാകുമെന്ന് പ്രതീക്ഷിക്കുന്നതായും ഡി.ഐ.എഫ്.സി ചീഫ് ലീഗൽ ഓഫിസർ ജാക്വസ് വിസർ പറഞ്ഞു.
