യുഎഇയിൽ റമദാൻ മാസത്തിൽ ജോലി സമയം കുറച്ചതിന് പിന്നാലെ ദുബായിൽ സ്വകാര്യ സ്കൂൾ പ്രവൃത്തി സമയവും കുറച്ചു. ദുബായിലെ സ്കൂൾ സമയം അഞ്ച് മണിക്കൂറിൽ കൂടരുതെന്നാണ് നിർദേശിച്ചിരിക്കുന്നത്. നോളജ് ആന്റ് ഹ്യൂമൻ ഡെവലപ്മെൻ്റ് അതോറിറ്റിയാണ് (കെഎച്ച്ഡിഎ) പ്രവൃത്തി സമയവുമായി ബന്ധപ്പെട്ട അറിയിപ്പ് നൽകിയത്.
വിദ്യാർത്ഥികൾക്കും അധ്യാപകർക്കും ആത്മീയ കാര്യങ്ങൾക്ക് സമയം കണ്ടെത്തുന്നതിനും ശാരീരിക അസ്വസ്ഥതകൾ ഒഴിവാക്കുന്നതിനുമായാണ് പുതിയ തീരുമാനമെടുത്തത്. അതോടൊപ്പം വെള്ളിയാഴ്ചകളിൽ 12 മണിക്ക് സ്കൂളുകൾ പൂർത്തിയാക്കണമെന്നും നിർദേശത്തിലുണ്ട്. സ്കൂളുകളിലെ പ്രവൃത്തി സമയം നിർണയിക്കുന്നതിനായി രക്ഷിതാക്കളുമായി കൂടിയാലോചിക്കാനാണ് പല സ്കൂളുകളും തീരുമാനിച്ചിരിക്കുന്നത്.
അതേസമയം, ചില സ്കൂളുകൾ തിങ്കൾ മുതൽ വ്യാഴം വരെ രാവിലെ 7.45 മുതൽ 12.45 വരെ സമയക്രമം നിശ്ചയിച്ചിട്ടുണ്ട്. കൂടാതെ വെള്ളിയാഴ്ചകളിലെ സാധാരണ സ്കൂൾ സമയക്രമവും പാലിക്കും. സ്കൂളുകളുടെ പ്രവർത്തന സമയം സംബന്ധിച്ച തീരുമാനം ഉടൻ നിർണയിക്കും. മാർച്ച് 12-ന് രാജ്യത്ത് വിശുദ്ധ മാസത്തിൻ്റെ ആരംഭം ഉണ്ടാകുമെന്നാണ് വിലയിരുത്തുന്നത്.