കുട്ടികൾ എന്തെങ്കിലും ആഗ്രഹം പറഞ്ഞാൽ സാധിക്കുമെങ്കിൽ അത് ചെയ്ത് കൊടുക്കണമെന്നാണല്ലോ പറയുന്നത്. ഇപ്പോൾ തന്റെ കുട്ടി ആരാധകരന്റെ വളരെ കാലത്തെ ആഗ്രഹം സാധിച്ചുനൽകി സാമൂഹ്യമാധ്യമങ്ങളിൽ കയ്യടി നേടുകയാണ് ഇന്ത്യൻ ക്രിക്കറ്റ് താരം സഞ്ജു സാംസൺ. ഭിന്നശേഷിക്കാരനായ യാസീന്റെ പന്തുകൾ നേരിട്ട് വളരെ കാലത്തെ സ്വപ്നം സാധിച്ചുനൽകിയിരിക്കുകയാണ് സഞ്ജു.
11 വയസുകാരനായ യാസീന്റെ വലിയ സ്വപ്നമായിരുന്നു സഞ്ജുവിനെ നേരിട്ട് കാണുക എന്നത്. ഇതറിഞ്ഞ സഞ്ജു ഒരിക്കൽ യാസീനെ വീഡിയോ കോൾ ചെയ്ത് സംസാരിക്കുകയും നാട്ടിലെത്തുമ്പോൾ തീർച്ചയായും കാണാൻ വരുമെന്ന് ഉറപ്പ് നൽകുകയും ചെയ്തു. അങ്ങനെ
ഐപിഎൽ 2024 സീസണിനായുള്ള തയ്യാറെടുപ്പിനായി പെരിന്തൽമണ്ണയിലെത്തിയതോടെ തന്റെ കുട്ടി ആരാധകനെ കാണാൻ തന്നെ സഞ്ജു തീരുമാനിച്ചു.
വെറുതെ കണ്ട് മടങ്ങുക മാത്രമല്ല, യാസീൻ എറിഞ്ഞ പന്ത് സഞ്ജു നേരിടുകയും ചെയ്തു. യാസീന് രാജസ്ഥാൻ റോയൽസിന്റെ തൊപ്പിയും ജഴ്‌സിയും സമ്മാനം നൽകാനും സഞ്ജു മറന്നില്ല. യാസീൻ പന്തെറിഞ്ഞു നൽകുന്നതിന്റെയും സഞ്ജു ബാറ്റ് ചെയ്യുന്നതിന്റെയുമെല്ലാം വീഡിയോ രാജസ്ഥാൻ റോയൽസ് ഇൻസ്‌റ്റഗ്രാമിൽ പങ്കുവെയ്ക്കുകയും ചെയ്തു. യാസിൻ്റെ ബൗളിങ് മികവിനെ താരം അഭിനന്ദിക്കുന്നതും വീഡിയോയിലുണ്ട്. സംഭവം സാമൂഹ്യമാധ്യമങ്ങളിൽ വൈറലാകുകയും ചെയ്തു. എന്തായാലും തന്റെ സ്വപ്നം യാഥാർത്ഥ്യമായതിന്റെ സന്തോഷത്തിലാണ് ഈ 11കാരൻ.
