സാമൂഹ്യ മാധ്യമങ്ങളിൽ വളരെയധികം ട്രെന്റിങ്ങായി മുന്നേറുന്നതാണ് സിനിമാ താരങ്ങളുടെ കമന്റ് ആവശ്യപ്പെട്ടുകൊണ്ടുള്ള വീഡിയോകൾ. തങ്ങളുടെ പ്രിയപ്പെട്ട താരങ്ങൾ കമന്റ് ചെയ്താൽ മാത്രമേ പഠിക്കൂ എന്ന വിധത്തിൽ പ്രത്യക്ഷപ്പെടുന്ന വീഡിയോകൾക്ക് പല താരങ്ങളും മറുപടിയും നൽകാറുണ്ട്. ഇപ്പോൾ ഇത്തരത്തിൽ ടൊവിനോയുടെ മറുപടി ആവശ്യപ്പെട്ടുകൊണ്ടുള്ള വീ‍ഡിയോയാണ് തരംഗമായിരിക്കുന്നത്.
താഹ ഹസൂൻ എന്ന ഇൻസ്റ്റഗ്രാം പേജിലാണ് വീഡിയോ പ്രത്യക്ഷപ്പെട്ടിരിക്കുന്നത്. ‘ഈ വീഡിയോക്ക് ടൊവിനോ തോമസ് കമൻ്റ് ചെയ്താൽ ഞാൻ എന്റെ പരീക്ഷയ്ക്കായുളള തയ്യാറെടുപ്പുകൾ ആരംഭിക്കും’ എന്ന അടിക്കുറിപ്പോടെയാണ് വീഡിയോ പോസ്റ്റ് ചെയ്തിരിക്കുന്നത്. തണ്ണിമത്തൻ കഴിച്ചുകൊണ്ടിരിക്കുന്ന ഒരു യുവാവാണ് വീഡിയോയിൽ ഉള്ളത്. വീഡിയോ പോസ്റ്റ് ചെയ്‌ത് രണ്ട് ദിവസത്തിനകം തന്നെ സംഭവം ടൊവിനോയുടെ ശ്രദ്ധയിലും പെട്ടു.
വീഡിയോയ്ക്ക് താരം മറപടി നൽകിയത് “പോയിരുന്ന് പഠിക്ക് മോനെ” എന്നായിരുന്നു. ഇതോടെ താരത്തിന്റെ കമന്റും വീഡിയോയും സമൂഹമാധ്യമങ്ങളിൽ വൈറലായിരിക്കുകയാണ്. നിരവധി പേരാണ് താരത്തിനെ അഭിനന്ദിച്ചിരിക്കുന്നത്. ഇത്തരത്തിൽ മുമ്പ് വിജയ് ദേവരകൊണ്ടയുടെ കമന്റ് അഭ്യർത്ഥിച്ച് വീഡിയോ പങ്കുവെച്ച വിദ്യാർത്ഥിനികൾക്ക് വിജയ് മറുപടി നൽകിയത് ശ്രദ്ധേയമായിരുന്നു. ‘പരീക്ഷയിൽ 90 ശതമാനം മാർക്ക് നേടിയാൽ ഞാൻ നിങ്ങളെ നേരിട്ട് വന്ന് കാണാം’ എന്നായിരുന്നു വിജയ്‌യുടെ കമന്റ്. ഇതോടെ ഇത്തരം വീഡിയോകൾ ട്രെന്റിങ് ആകുകയും ചെയ്തു.
