പുതിയ ചിത്രത്തിന്റെ പോസ്റ്ററിൽ ഗംഭീര ലുക്കിലും ഭാവത്തിലുമെത്തിയ വിനീത് ശ്രീനിവാസനാണ് സാമൂഹ്യമാധ്യമങ്ങളിലെ ചർച്ചാ വിഷയം. പോസ്റ്റർ കണ്ട് ഇത് നമ്മുടെ വിനീത് തന്നെയാണോ എന്നാണ് ആരാധകർ ചോദിക്കുന്നത്. കാരണം എട്ട് സുന്ദരിമാർക്ക് നടുവിൽ കാസിനോവയേപ്പോലെയാണ് താരം ഇരിക്കുന്നത്. ഇതോടെ ചിത്രത്തേക്കുറിച്ചുള്ള ചർച്ചകളും ചൂടുപിടിക്കുകയാണ്.
‘ഒരു ജാതി ജാതകം’ എന്ന തന്റെ പുതിയ സിനിമയുടെ ഫസ്റ്റ് ലുക്ക് പോസ്റ്ററിലാണ് നീല സ്യൂട്ടണിഞ്ഞ് സുന്ദരനായി വിനീത് പ്രത്യക്ഷപ്പെട്ടത്. ചുറ്റിനും ഒരു സംഘം സുന്ദരിമാരും. നിഖിലാ വിമൽ, യാദു, സയനോരാ ഫിലിപ്പ്, ഇന്ദുതമ്പി, ഹരിത, ചിപ്പി ദേവസി, രജിതാ മധു, ഹരിത എന്നിവരാണ് താരത്തിന് ചുറ്റുമുള്ളത്. ഇത് കണ്ട് ആരെയും അസൂയപ്പെടുത്തുന്ന ചിത്രമെന്നാണ് ആരാധകർ അഭിപ്രായപ്പെട്ടിരിക്കുന്നത്.
അരവിന്ദന്റെ അതിഥികൾ എന്ന ചിത്രത്തിന് ശേഷം വിനീത് ശ്രീനിവാസനെ നായകനാക്കി എം. മോഹനൻ സംവിധാനം ചെയ്യുന്ന ചിത്രം കൂടിയാണിത്. ആക്ഷൻ സ്റ്റാർ ബാബു ആൻ്റണി സിനിമയിൽ പ്രധാന കഥാപാത്രമായും എത്തുന്നുണ്ട്. വർണ ചിത്രയുടെ ബാനറിൽ മഹാ സുബൈർ നിർമ്മിക്കുന്ന ഒരു ജാതി ജാതകത്തിന്റെ നിർമ്മാണ പ്രവർത്തനങ്ങൾ പൂർത്തിയായി വരികയാണ്.
