മലയാള സിനിമാ പ്രേക്ഷകരെ സന്തോഷത്തിലാഴ്ത്തി ആ വാർത്ത എത്തി. ആട് ജീവിതം നേരത്തെ ജനങ്ങളിലേയ്ക്ക് എത്തുന്നു. സിനിമയുടെ പുതിയ റിലീസ് തിയതിയാണ് അണിയറ പ്രവർത്തകർ ഇപ്പോൾ പ്രഖ്യാപിച്ചിരിക്കുന്നത്. മാർച്ച് 28-നാണ് ചിത്രം തിയേറ്ററുകളിലെത്തുക. ഇതോടെ അവേശത്തിലായിരിക്കുകയാണ് സിനിമാ പ്രേമികൾ.
വളരെ പ്രതീക്ഷയോടെയാണ് പ്രേക്ഷകർ ചിത്രത്തിനായി കാത്തിരിക്കുന്നത്. മലയാളത്തിൽ ഇന്നും ബെസ്‌റ്റ്‌സെല്ലറുകളിൽ ഒന്നായ ബെന്യാമിന്റെ ‘ആടുജീവിതം’ എന്ന നോവൽ സിനിമയാകുന്നു എന്ന വാർത്ത പുറത്തുവന്നപ്പോൾ മുതൽ ആകാംക്ഷയിലാണ് സിനിമാ പ്രേമികൾ. കൂടാതെ മരുഭൂമിയിൽ ഒറ്റപ്പെട്ട നജീബ് എന്ന യുവാവായി എത്തുന്ന പൃഥ്വിരാജിന്റെ ശാരീരിക മാറ്റങ്ങൾ ഇതിനോടകം ഏവരെയും ഞെട്ടിച്ചിട്ടുമുണ്ട്. സംഭവകഥ സിനിമയായി മുന്നിലെത്തുമ്പോൾ അത് ഇരുകയ്യുംനീട്ടി സ്വീകരിക്കുന്ന ചരിത്രമാണ് കാണികൾക്കുമുള്ളത്.
കേരളത്തിൽ മാത്രമല്ല, ലോകമെമ്പാടുമുള്ള തിയേറ്ററുകളിൽ ചിത്രം റിലീസ് ചെയ്യുമെന്നാണ് അണിയറ പ്രവർത്തകർ അറിയിച്ചിരിക്കുന്നത്. ബ്ലെസി സംവിധാനം ചെയ്യുന്ന ചിത്രത്തിൽ പൃഥ്വിരാജിന്റെ നായികയായെത്തുന്നത് അമല പോളാണ്. ജോർദാനിൽ മുഖ്യപങ്കും ഷൂട്ട് ചെയ്ത സിനിമയിൽ ഓസ്‌കർ അവാർഡ് ജേതാക്കളായ എ.ആർ. റഹ്‌മാൻ സംഗീതവും റസൂൽ പൂക്കുട്ടി ശബ്ദമിശ്രണവും നിർവഹിക്കുന്നു എന്നതും ജനങ്ങളെ ആകർഷിക്കുന്നുണ്ട്. സിനിമയുടെ റിലീസ് തിയതി അടുത്തെത്തിയതിന്റെ സന്തോഷത്തിലാണ് ഇപ്പോൾ ആരാധകർ.
