ഇന്ത്യൻ ക്രിക്കറ്റ് ടീമിന്റെ മുൻ നായകൻ ദത്താജിറാവു കൃഷ്ണറാവു ഗെയ്ക്വാദ് (95) അന്തരിച്ചു. ഇന്ന് പുലർച്ചെ ബറോഡയിലെ വീട്ടിൽ വെച്ചായിരുന്നു അന്ത്യം. പ്രായാധിക്യം മൂലമുള്ള അവശതകളെത്തുടർന്ന് കഴിഞ്ഞ കുറച്ച് ദിവസങ്ങളായി ആശുപത്രിയിൽ ചികിത്സയിലായിരുന്നു. ജീവിച്ചിരിക്കുന്നവരിലെ ഏറ്റവും പ്രായം കൂടിയ താരമാണ് വിടവാങ്ങിയത്.
ഇന്ത്യയ്ക്ക് വേണ്ടി 11 ടെസ്റ്റുകളിലാണ് ഗെയ്ക്വാദ് കളത്തിലിറങ്ങിയത്. അതിൽ നാലെണ്ണത്തിൽ ഇന്ത്യയെ നയിക്കുകയും ചെയ്‌തു. ഇംഗ്ലണ്ടിനെതിരെ 1959-ൽ നടന്ന ടെസ്റ്റ് മത്സരങ്ങളിലാണ് വലംകൈയൻ ബാറ്ററായ അദ്ദേഹം ഇന്ത്യയെ നയിച്ചത്. 11 മത്സരങ്ങളിൽ നിന്നായി 18.42 ശരാശരിയോടെ ഒരു അർധസെഞ്ച്വറി ഉൾപ്പെടെ 350 റൺസായിരുന്നു നേടിയത്. 1952 ജൂണിൽ ഇംഗ്ലണ്ടിനെതിരെയായിരുന്നു അരങ്ങേറ്റം. ഒൻപത് വർഷത്തോളം ടീമിൽ തുടർന്ന അദ്ദേഹം 1961-ൽ ചെന്നൈയിൽ പാക്കിസ്ഥാനെതിരെ നടന്ന ടെസ്റ്റിലാണ് അവസാനമായി ഇന്ത്യക്കുവേണ്ടി കളിച്ചത്.
മുൻ ഇന്ത്യൻ താരം അൻഷുമാൻ ഗെയ്ക്വാദിന്റെ പിതാവ് കൂടിയാണ് അദ്ദേഹം. 1957-58 സീസണിൽ ബറോഡയ്ക്ക് വേണ്ടി രഞ്ജി ട്രോഫി നേടിക്കൊടുത്ത ക്യാപ്റ്റനാണ് ഡി.കെ എന്ന പേരിൽ അറിയപ്പെടുന്ന ഗെയ്ക്വാദ്. ഫസ്റ്റ് ക്ലാസ് ക്രിക്കറ്റിൽ ബറോഡയ്ക്ക് വേണ്ടി 1947 മുതൽ 1964 വരെ കളത്തിലിറങ്ങി. 110 മത്സരങ്ങളിൽ നിന്ന് 17 സെഞ്ച്വറികളും 23 അർധസെഞ്ച്വറികളുമായി 5,788 റൺസാണ് നേടിയത്.
