കോഴിക്കോട് കരിപ്പൂർ വിമാനത്താവളത്തിൽ വലിയ വിമാനങ്ങളുടെ സർവീസ് പുനരാരംഭിക്കാനൊരുങ്ങുന്നു. ഇതുമായി ബന്ധപ്പെട്ട സാധ്യത പരിശോധിക്കാൻ വിദഗ്‌ധ സംഘത്തെ അയയ്ക്കുമെന്ന് സിവിൽ ഏവിയേഷൻ ഡയറക്ടർ ജനറൽ വിക്രം ദേവ് ദത്ത്, എം.കെ.രാഘവൻ എംപിയെ അറിയിച്ചു.
വിമാനാപകട അന്വേഷണ ബ്യൂറോ നിർദേശിച്ച സുരക്ഷാ നിർദേശങ്ങളിൽ ഭൂരിഭാഗവും നടപ്പാക്കിയിട്ടുണ്ട്. എന്നാൽ റൺവേ എൻഡ് സേഫ്റ്റി ഏരിയ നവീകരണം പൂർത്തിയാകാൻ കാത്തുനിൽക്കണമെന്ന കേന്ദ്രനിലപാട് തൊട്ടടുത്തുള്ള സ്വകാര്യ വിമാനത്താവളങ്ങളെ സഹായിക്കാൻ മാത്രമാണെണ് കോഴിക്കോട് വിമാനത്താവള ഉപദേശക സമിതി കോ ചെയർമാൻ കൂടിയായ എം.കെ. രാഘവൻ എംപി ചുണ്ടിക്കാട്ടി.
2002 മുതൽ ഒരപകടവും കൂടാതെ വലിയ വിമാനങ്ങൾ കോഴിക്കോട് വിമാനത്താവളത്തിൽ സർവീസ് നടത്തുന്നുണ്ട്. 2015-ൽ താത്കാലികമായി സർവീസ് നിർത്തിവെച്ചശേഷം കൃത്യമായ പഠനങ്ങൾക്കും പരിശോധനകൾക്കും ശേഷമാണ് 2018-ൽ സർവീസ് പുനഃസ്ഥാപിച്ചത്. കൂടാതെ 2020- ൽ നടന്ന വിമാനാപകടശേഷം വലിയ വിമാനങ്ങൾക്ക് നിരോധനമേർപ്പെടുത്തിയതിന് അടിസ്ഥാനമില്ലെന്നും എം.പി. നിവേദനത്തിൽ ചൂണ്ടിക്കാട്ടി.
