വെള്ളിത്തിരയിലെ ശക്തമായ സ്ത്രീ കഥാപാത്രങ്ങളിലൂടെ മലയാളികളുടെ ഹൃദയത്തിൽ ഇടംനേടിയ താരമാണ് മഞ്ജു വാര്യർ. ഇടക്കാലത്ത് സിനിമയിൽ നിന്നും വിട്ടുനിന്ന താരം ശക്തമായ കഥാപാത്രങ്ങളിലൂടെ വെള്ളിത്തിരയിലേയ്ക്ക് മടങ്ങിയെത്തുകയായിരുന്നു. പിന്നീട് മലയാള സിനിമയിൽ സജീവമായ താരം തമിഴ് ചിത്രങ്ങളിലും മികച്ച കഥാപത്രങ്ങളെ അവതരിപ്പിച്ചിരുന്നു. ഇപ്പോൾ മിസ്റ്റർ എക്സ് എന്ന ചിത്രത്തിന്റെ ഷൂട്ടിങ്ങിന് വേണ്ടിയുള്ള തയ്യാറെടുപ്പിലാണ് മഞ്ജു വാര്യർ.
ചിത്രത്തിൽ നായക വേഷത്തിലെത്തുന്നത് നടൻ ആര്യയാണ്. ചിത്രത്തിന് വേണ്ടി വമ്പൻ മേക്കോവറാണ് ആര്യ നടത്തിയിരിക്കുന്നത്. സിക്സ്പാക്കുമായി ജിമ്മിൽ വർക്കൗട്ട് ചെയ്യുന്ന ദൃശ്യങ്ങൾ ആര്യ ഇടക്കിടെ ആരാധകരുമായി പങ്കിടാറുണ്ട്. ഇപ്പോൾ താരം പങ്കിട്ടിരിക്കുന്ന വീഡിയോയും അതിന് നൽകിയ അടിക്കുറിപ്പുമാണ് സാമൂഹ്യമാധ്യമങ്ങളിൽ വൈറലാകുന്നത്. മിസ്റ്റർ എക്സിലെ അയൺ ലേഡിയാണ് മഞ്ജു വാര്യരെന്നാണ് ആര്യ വീഡിയോയുടെ അടിക്കുറിപ്പിൽ പറയുന്നത്.
ആര്യയുടെ പോസ്റ്റിന് നിരവധി പേരാണ് മികച്ച അഭിപ്രായങ്ങൾ രേഖപ്പെടുത്തത്. അസുരൻ, തുനിവ് എന്നീ തമിഴ് ചിത്രങ്ങൾക്ക് ശേഷം മഞ്ജു അഭിനയിക്കുന്ന ചിത്രമാണ് മിസ്റ്റർ എക്സ്. അസുരനിലെ അഭിനയം മഞ്ജുവിന് മികച്ച പ്രേക്ഷക പ്രതികരണം നേടിക്കൊടുക്കുകയും ചെയ്തിരുന്നു. അതോടെ തമിഴ് സിനിമാ മേഖലയിൽ താരം തന്റേതായ സ്ഥാനം നേടുകയും ചെയ്തിരുന്നു. അതിനാൽ മിസ്റ്റർ എക്സിനേക്കുറിച്ചും വലിയ പ്രതീക്ഷയിലാണ് ആരാധകർ.
