ഇന്ത്യൻ ക്രിക്കറ്റ് താരം മായങ്ക് അഗർവാളിനെ ദേഹാസ്വസ്ഥ്യം മൂലം ഐസിയുവിൽ പ്രവേശിപ്പിച്ചു. വിമാന യാത്രയ്ക്കൊരുങ്ങവെ ദേഹാസ്വസ്ഥ്യം അനുഭവപ്പെടുകയും തുടർന്ന് അഗർവാളിനെ ആശുപത്രിയിൽ പ്രവേശിപ്പിക്കുകയുമായിരുന്നു.
വായയിലും തൊണ്ടയിലും അസ്വസ്ഥത അനുഭവപ്പെട്ട മായങ്കിനെ അഗർത്തലയിലെ ഐഎൽഎസ് ഹോസ്പിറ്റലിലെ ഐസിയുവിലണ് പ്രവേശിപ്പിച്ചത്. ഒരു ബോട്ടിലിൽ നിന്ന് വെള്ളം കുടിച്ചതിനു പിന്നാലെയാണ് അഗർവാളിന് അസ്വസ്ഥത അനുഭവപ്പെട്ടതെന്ന് ഔദ്യോഗിക വൃത്തങ്ങൾ സൂചിപ്പിച്ചു. താരത്തോടൊപ്പം ടീം മാനേജർ രമേശും വിമാനത്തിൽ നിന്ന് തിരിച്ചിറങ്ങി.
ഫെബ്രുവരി 2ന് റെയിൽവേയ്സിനെതിരെ ആരംഭിക്കുന്ന രഞ്ജി മത്സരത്തിനായി അഗർത്തലയിൽ നിന്ന് സൂറത്തിലേക്ക് യാത്ര ചെയ്യാൻ ഒരുങ്ങുകയായിരുന്നു മായങ്ക്. രഞ്ജിയിൽ കർണാടക ടീമിൻ്റെ ക്യാപ്റ്റനാണ് അദ്ദേഹം. താരം അപകടനില തരണം ചെയ്തു എന്നാണ് റിപ്പോർട്ട്.
