പ്രവാസികൾക്ക് വായ്പ അനുവദിക്കുന്നതിന് കുവൈത്തിലെ ബാങ്കുകൾ കർശന നിയന്ത്രണം ഏർപ്പെടുത്തി. ഉയർന്ന നിലവാരമുള്ള ക്രെഡിറ്റ് റെക്കോർഡ്, ജോലി സ്ഥിരത, ശമ്പളം, സേവനാനന്തര ആനുകൂല്യം എന്നിവ പരിഗണിച്ചാണ് ഇനിമുതൽ കുവൈത്തിൽ ലോൺ അനുവദിക്കുക.
ഡോക്ട‌ർമാർ, നഴ്‌സുമാർ, ടെക്‌നീഷ്യൻമാർ തുടങ്ങി വിവിധ പ്രൊഫഷണൽ തസ്‌തികകളിൽ ജോലി ചെയ്യുന്നവർക്കാണ് ബാങ്ക് ലോൺ അനുവദിക്കുന്നതിനായി മുൻഗണന ലഭിക്കുക. മറ്റ് ജോലികളിൽ ഏർപ്പെട്ടിരിക്കുന്നവർക്ക് കടുത്ത നിയന്ത്രണങ്ങളോടെയാകും വായ്പ ലഭ്യമാക്കുന്നത്.
കുവൈത്തിൽ 10 വർഷത്തെ സേവനവും കുറഞ്ഞത് 1,250 ദിനാർ ശമ്പളവും ഉള്ള വിദേശികൾക്ക് അനുവദിക്കുന്ന വായ്പ 25,000 ദിനാറാക്കി പരിമിതപ്പെടുത്തിയിട്ടുണ്ട്. കൂടാതെ 55 വയസിന് മുകളിലുള്ളവർക്ക് കർശന നിബന്ധനകളോടെയാണ് ഇനിമുതൽ വായ്പ അനുവദിക്കുക. സ്വദേശിവൽക്കരണത്തിന് സാധ്യതയില്ലാത്ത തസ്‌തികയിൽ ജോലി ചെയ്യുന്നവർക്കും വായ്പ ലഭിക്കുമെന്നാണ് റിപ്പോർട്ട്.
