അയോധ്യയിലെ രാമക്ഷേത്ര പ്രതിഷ്ഠാ ദിന ദിവസം വീടുകളിൽ രാമനാമം ജപിച്ചും വിളക്കു തെളിയിച്ചും ആഘോഷിക്കണമെന്ന് ആഹ്വാനം ചെയ്ത് ഗായിക കെഎസ് ചിത്ര. സമൂഹ മാധ്യമത്തിൽ ചിത്ര പങ്കുവച്ച വീഡിയോ ഇപ്പോൾ വൈറലാണ്. സോഷ്യല്‍ മീഡിയയില്‍ വിഡിയോ വൈറലായതോടെ നിരവധി പേരാണ് ചിത്രയെ പിന്തുണച്ചും വിമര്‍ശിച്ചും രംഗത്തെത്തുന്നത്.
“ജനുവരി 22ന് അയോധ്യയില്‍ പ്രതിഷ്ഠാദിനം നടക്കുമ്പോള്‍ ഉച്ചയ്ക്ക് 12.20ന് ശ്രീരാമ, ജയരാമ, ജയജയ രാമ’ എന്ന രാമമന്ത്രം എല്ലാവരും ജപിക്കണം. അതുപോലെ വൈകുന്നേരം അഞ്ച് തിരിയുള്ള വിളക്ക് വീടിന്റെ നാനാഭാഗത്തും തെളിയിക്കുകയും വേണം. ഭഗവാന്റെ അനുഗ്രഹം എല്ലാവര്‍ക്കും പരിപൂര്‍ണമായി ഉണ്ടാകട്ടെ എന്ന് പ്രാര്‍ത്ഥിക്കുന്നു”- ചിത്ര വീഡിയോയിൽ പറഞ്ഞു.
കഴിഞ്ഞ ദിവസമാണ് അയോധ്യയില്‍ നിന്നുള്ള അക്ഷതം കെഎസ് ചിത്ര സ്വീകരിക്കുന്ന ചിത്രങ്ങൾ പുറത്ത് വന്നത്. രാഷ്ട്രീയ സ്വയം സേവക് സംഘം എറണാകുളം വിഭാഗ് സഹകാര്യവാഹ് രാജേഷ് ആണ് വീട്ടിലെത്തി ചിത്രയ്ക്ക് അക്ഷതം നല്‍കിയത്. ലഘുലേഖയും ക്ഷണപ്പത്രവും ഇതോടൊപ്പം കൈമാറി.
