കാലാവസ്ഥാ മുന്നറിയിപ്പുകൾ പാലിക്കാതെ സ്വയം അപകടത്തിലേക്കൊ മറ്റുളള‍വരെ അപകടത്തിലേക്കെത്തിക്കുകയൊ ചെയ്യുന്ന പെരുമാറ്റങ്ങൾക്ക് തടവും പി‍ഴയും ശിക്ഷയെന്ന് മുന്നറിയിപ്പ്. മ‍ഴയും പൊടിക്കാറ്റും ഇതര കാലാവസ്ഥാ വ്യതിയാനങ്ങളും ഉണ്ടാകുമ്പോൾ അധികൃതര്‍ നല്‍കുന്ന മുന്നറിയിപ്പുകൾ അവഗണിക്കുന്നവര്‍ക്കെതിരേയാണ് നടപടി.
നിരുത്തരവാദപരമായ പെരുമാറ്റം കൂടുതല്‍ ആ‍ളുകൾക്ക് പ്രചോദനമാകുമെന്നും മറ്റുളളവരും ആവര്‍ത്തിക്കാന്‍ സാധ്യതയുണ്ടെന്നും അധികൃതര്‍ സൂചിപ്പിച്ചു. വാഹനമോടിക്കുന്നവരും ഇത്തരം മുന്നറിയിപ്പുകൾ പാലിക്കേണ്ടതുണ്ട്.
കഴിഞ്ഞ ആഴ്ച മ‍ഴയും പൊടിക്കാറ്റും ഉണ്ടാകാനുളള സാധ്യതയെപ്പറ്റി അധികൃതര്‍ മുന്നറിയിപ്പ് നല്‍കിയിരുന്നു. പൊടിക്കാറ്റില്‍ ദൃശ്യപരത കുറയുന്നതിനാല്‍ വാഹനമോടിക്കുന്നവര്‍ ജാഗ്രത പാലിക്കണമെന്നും മറ്റുളളവര്‍ തുറസ്സായ സ്ഥലങ്ങൾ ഉപേക്ഷിച്ച് വീടിനുളളില്‍ ക‍ഴിയണമെന്നും നിര്‍ദ്ദേശമുണ്ടായിരുന്നു. എന്നാല്‍ പൊടിക്കാറ്റ് രൂക്ഷമായ സാഹചര്യത്തിലും പലരും നിര്‍ദ്ദേശം പാലിക്കാന്‍ തയ്യാറായില്ലെന്നും അധികൃതര്‍ ഓര്‍മ്മിപ്പിച്ചു.
മുന്നറിയിപ്പുകൾ ശ്രദ്ധിക്കേണ്ടത് വ്യക്തികളുടെ ഉത്തരവാദിത്തമാണെന്നും കാലാവസ്ഥാ സാഹചര്യങ്ങൾ സൃഷ്ടിക്കുന്ന അപകടങ്ങളിലേക്ക് സ്വയം എടുത്തുചാടുന്നതും മറ്റുളളവര്‍ക്ക് അപകടം ഉണ്ടാക്കുംവിധം പ്രവര്‍ത്തിക്കുന്നതും ഫെഡറൽ ഡിക്രി-നിയമം നമ്പര്‍ 31/2021 പ്രകാരവും ആർട്ടിക്കിൾ 399 പ്രകാരവും ശിക്ഷാര്‍ഹമാണെന്ന് നിയമ വിദഗ്ദ്ധരും ചൂണ്ടിക്കാട്ടി.
15 വയസ്സിന് താഴെയുള്ള കുട്ടിയൊ പരിമിതമായ മാനസികമോ ശാരീരികമോ ആയ വെല്ലുവിളി നേരിടുന്നവരൊ അപകടപ്പെടുകയാണെങ്കിൽ അതേ നിയമത്തിലെ ആർട്ടിക്കിൾ 400 അനുസരിച്ച് 2 വർഷം വരെ തടവിനും വിധേയമാക്കാം. അപകടത്തിൽപ്പെടുന്ന കുട്ടി 7 വയസ്സിന് താഴെയുള്ളവരാണെങ്കിൽ കൂടുതൽ ശിക്ഷകളും നിലവിലുണ്ട്.
