ഹജ്ജ്-ഉംറ തീർഥാടകർക്ക് സേവനം നൽകുന്ന മികച്ച മൂന്നു പദ്ധതികൾക്ക് പുരസ്കാരം നൽകും. ഹജ്ജ്, ഉംറ മന്ത്രി ഡോ. തൗഫീഖ് അൽ റബീഅയാണ് ഇക്കാര്യം അറിയിച്ചത്. ജിദ്ദ സൂപ്പർഡോമിൽ നടക്കുന്ന ഹജ്ജ്-ഉംറ സേവന സമ്മേളനത്തിലാണ് മന്ത്രി ഇക്കാര്യം പ്രഖ്യാപിച്ചത്.
തീർഥാടകർക്ക് മികച്ച സേവനം ഒരുക്കുന്നതിന് വേണ്ടി നൂതന സംരംഭങ്ങളുമായി മുന്നോട്ട് വരുന്നവരെ പ്രോത്സാഹിപ്പിക്കുന്നതിനാണ് പുരസ്കാരം നൽകുന്നത്. മികച്ച പദ്ധതികൾ അവതരിപ്പിക്കുന്നവരിൽ ഒന്നാം സ്ഥാനത്ത് എത്തുന്നവർക്ക് 10 ലക്ഷം റിയാലാണ് സമ്മാനമായി നൽകുക. രണ്ടാം സമ്മാനം അഞ്ചു ലക്ഷം റിയാലും മൂന്നാം സമ്മാനം രണ്ടര ലക്ഷം റിയാലുമാണ്.
വിജയികളുടെ പേരുകൾ അടുത്ത വർഷം നടക്കുന്ന ഹജ്ജ് സമ്മേളനത്തിൽ പ്രഖ്യാപിക്കുമെന്ന് മന്ത്രി അറിയിച്ചു. സംരംഭകർക്ക് അവരുടെ പദ്ധതികൾ അവതരിപ്പിക്കാനുള്ള അവസരമാണ് ഈ പുരസ്കാരം. ഒരു വർഷത്തിനുള്ളിലെ പ്രവൃത്തികൾ വിലയിരുത്തിയാവും അവാർഡ് നിശ്ചയിക്കുക എന്നും മന്ത്രി പറഞ്ഞു.
