ഏകദിന ക്രിക്കറ്റില്‍ നിന്നും വിരമിച്ച് ഓസ്ട്രേലിയൻ സൂപ്പർതാരം ഡേവിഡ് വാർണർ. ഇന്ത്യയ്ക്കെതിരായ ലോകകപ്പ് ഫൈനലാണ് കരിയറിലെ അവസാന ഏകദിന മൽസരമെന്ന് സിഡ്‌നിയിൽ നടത്തിയ വാർത്താസമ്മേളനത്തിൽ വാർണർ പറഞ്ഞു. ലോകകപ്പിലെ ഓസ്ട്രേലിയയുടെ കിരീടനേട്ടത്തിൽ പങ്കാളിയാകാൻ സാധിച്ചതിൽ സന്തോഷമുണ്ടെന്നും കുടുംബത്തോടൊപ്പം സമയം ചിലവഴിക്കാനാണ് താൻ ഇനി ആഗ്രഹിക്കുന്നതെന്നും താരം വ്യക്തമാക്കി.
ജനുവരി മൂന്നിന് ആരംഭിക്കുന്ന പാക്കിസ്ഥാൻ പരമ്പരയോടെ ടെസ്റ്റിൽ നിന്ന് വിരമിക്കുമെന്ന് വാർണർ മുമ്പ് പ്രഖ്യാപിച്ചിരുന്നു. കഴിഞ്ഞ ലോകകപ്പിലെ 11 കളികളിൽ നിന്നായി 535 റൺസാണ് വാർണർ അടിച്ചുകൂട്ടിയത്. രണ്ട് സെഞ്ച്വറികളും ഒരു അർധ സെഞ്ച്വറിയും ഇതിൽ ഉൾപ്പെടും.
161 ഏകദിനങ്ങളിൽ നിന്നായി 22 സെഞ്ച്വറികളും 33 അർധ സെഞ്ച്വറികളുമുൾപ്പെടെ 6,932 റൺസാണ് ഈ ഇടംകയ്യൻ ബാറ്റർ നേടിയത്. 2009-ൽ ദക്ഷിണാഫ്രിക്കയ്ക്കെ‌തിരെ ഏകദിനത്തിൽ അരങ്ങേറ്റം കുറിച്ച വാർണർ ഓസ്ട്രേലിയൻ റൺവേട്ടക്കാരുടെ പട്ടികയിൽ ആറാമനാണ്. 2015, 2021 ഏകദിന ലോകകപ്പ് നേട്ടങ്ങളിൽ നിർണായക പങ്ക് വഹിച്ച താരമാണ് വാർണർ.
