നടൻ വിജയകാന്തിന്റെ വേർപാട് വിശ്വസിക്കാനാകാതെ ആരാധകർ. വിജയകാന്തിന്റെ മരണ വാർത്ത പുറത്തുവന്നതിന് പിന്നാലെ അദ്ദേഹത്തിന്റെ വസതിക്ക് മുന്നിൽ ആരാധകപ്രവാഹമാണ് നിലയുറപ്പിച്ചിരിക്കുന്നത്. ജനത്തിരക്ക് നിയന്ത്രിക്കാൻ വൻ പൊലീസ് സന്നാഹം സ്ഥലത്ത് അണിനിരന്നിട്ടുണ്ട്.
തങ്ങളുടെ പ്രിയ താരത്തിന്റെ ഭൗതികശരീരം ഒരുനോക്ക് കാണാൻ വഴിയോരങ്ങളിലും സാധ്യമായ സ്ഥലങ്ങളിലുമെല്ലാം ആരാധകരും പാർട്ടി പ്രവർത്തകരും കാത്തുനിൽക്കുകയാണ്. പല സ്ഥലങ്ങളിലും ജനത്തിരക്കിനേത്തുടർന്ന് ഉന്തുംതള്ളുമുണ്ടാകുന്നുമുണ്ട്. ഇതോടെ വിവിധ മേഖലകളിൽ പൊലീസ് സുരക്ഷ ശക്തമാക്കിയിട്ടുണ്ട്.
ചെന്നൈയിലെ സ്വകാര്യ ആശുപത്രിയിൽ ചികിത്സയിൽ കഴിയുന്നതിനിടെ ഇന്ന് രാവിലെയായിരുന്നു വിജയകാന്തിന്റെ അന്ത്യം. കോവിഡും ന്യുമോണിയയും സ്ഥിരീകരിച്ചതിന് പിന്നാലെ അദ്ദേഹത്തെ വെന്റിലേറ്ററിലേക്ക് മാറ്റിയിരുന്നു. അപ്പോഴും ആശുപത്രിക്ക് മുന്നിൽ ആരാധകർ തടിച്ചുകൂടിയിരുന്നു. ഇവരെ നിയന്ത്രിക്കാനും പൊലീസ് വളരെ ബുദ്ധിമുട്ടിയിരുന്നു.
