ഇന്ത്യയിൽ പുതിയ തൊഴിൽ നിയമഭേദഗതി വരുന്നതായി അറിയിപ്പ്. അതോടെ തൊഴിലാളികൾക്ക് നൽകുന്ന ശമ്പളത്തിലും ജോലി സമയത്തിലും മാറ്റം വരും. 2019ൽ പാർലമെന്റിൽ പാസായ ലേബർ കോഡ് ആണ് 29 കേന്ദ്ര ലേബർ നിയമങ്ങൾക്ക് പകരമായി അവതരിപ്പിച്ചത്. ജൂലൈ 1 മുതൽ പുതിയ ലേബർ കോഡ് നടപ്പിലാക്കുമെന്നായിരുന്നു ആദ്യം പുറത്ത് വന്നതെങ്കിലും പല സംസ്ഥാനങ്ങളും പുതിയ കോഡ് അംഗീകരിക്കാത്തതാണ് വൈകാൻ കാരണം. പുതിയ ലേബർ കോഡിൽ സാമൂഹിക സുരക്ഷ, ലേബർ റിലേഷൻസ്, തൊഴിൽ സുരക്ഷ, ആരോഗ്യവും തൊഴിൽ സാഹചര്യവും എന്നിങ്ങനെ നാല് കോഡുകളാണ് ഉള്ളത്.
പുതിയ തൊഴിൽ നിയമം വന്നുകഴിഞ്ഞാൽ തൊഴിൽ ദാതാവിന് തൊഴിൽ സമയം തീരുമാനിക്കാം. എട്ട് മണിക്കൂർ ജോലിയെന്ന മാനദണ്ഡം ബാധകമല്ലാതെയാകും. 9 മുതൽ 12 മണിക്കൂർ വരെ ജോലി സമയം നീട്ടാനും കഴിയും. എന്നാൽ എത്ര മണിക്കൂർ അധികം ജോലി ചെയ്യുന്നുവോ അതിനനുസരിച്ച് അവധിയുടെ എണ്ണവും കൂട്ടേണ്ടി വരും. സാധാരണ നൽകുന്ന രണ്ട് ദിവസം അവധിക്ക് പകരം മൂന്ന് ദിവസം അവധി നൽകേണ്ടി വരും.
തൊഴിലാളിയുടെ ശമ്പളത്തിലും മാറ്റമുണ്ടാകും. പുതിയ തൊഴിൽ നിയമം വരുന്നതോടെ ഗ്രോസ് സാലറിയുടെ 50 ശതമാനമായിരിക്കും ബേസിക്ക് സാലറി. അങ്ങനെ പ്രൊവിഡന്റ് ഫണ്ടിലേക്കുള്ള സംഭാവന വർധിക്കും. കൈയിൽ ലഭിക്കുന്ന ശമ്പളത്തിൽ കുറവുണ്ടാകുമെന്ന് സാരം.
ജീവനക്കാരൻ അവസാനമായി ജോലി ചെയ്ത ദിവസം കഴിഞ്ഞാൽ രണ്ട് ദിവസത്തിനകം മുഴുവൻ ശമ്പളവും നൽകണമെന്നും പുതുക്കിയ നിയമത്തിൽ പറയുന്നു. നിലവിൽ 45 മുതൽ 60 ദിവസം വരെയാണ് മുഴുവൻ പണവും നൽകാൻ സ്ഥാപനങ്ങൾ എടുക്കുന്ന സമയം. തൊഴിലാളിയെ സ്ഥാപനത്തിൽ നിന്ന് പിരിച്ചുവിടുകയാണെങ്കിൽ രണ്ട് പ്രവർത്തി ദിവസത്തിനുള്ളിൽ കൊടുക്കാനുള്ള മുഴുവൻ തുകയും നൽകേണ്ടതായി വരും.
