സൗദി അറേബ്യയിൽ വംശനാശ ഭീഷണി നേരിടുന്ന ജീവികളെ വേട്ടയാടുന്നവർക്ക് മൂന്നു കോടി റിയാൽ വരെ പിഴയും 10 വർഷം വരെ തടവും ശിക്ഷ ലഭിക്കും. പരിസ്ഥിതി സുരക്ഷസേനയാണ് ഇതുമായി ബന്ധപ്പെട്ട മുന്നറിയിപ്പ് നൽകിയത്. രാജ്യത്തെ പരിസ്ഥിതി സംരക്ഷണ നിയമം പാലിക്കാൻ എല്ലാവരും ബാധ്യസ്ഥരാണ്. പ്രകൃതിയും അതിലെ ആവാസ വ്യവസ്ഥയും ജീവിവർഗങ്ങളും സംരക്ഷിക്കപ്പെടാൻ നിശ്ചയിച്ച മുഴുവൻ ചട്ടങ്ങളും എല്ലാവരും പാലിക്കേണ്ടത് നിർബന്ധമാണ്.
വംശനാശഭീഷണി നേരിടുന്ന വന്യജീവികളെ വേട്ടയാടുക, കൊല്ലുക, തോലും ഇറച്ചിയും ഉൾപ്പെടെയുള്ളവ കച്ചവടം നടത്തുക എന്നീ കാര്യങ്ങൾ ചെയ്യുന്നത് ഗുരുതരമായ കുറ്റമാണ്. പരിസ്ഥിതിയ്ക്കും വന്യജീവികൾക്കും നേരെയുള്ള നിയമലംഘനങ്ങളും ആക്രമണവും ശ്രദ്ധയിൽപ്പെടുന്ന മക്ക, റിയാദ്, കിഴക്കൻ പ്രവിശ്യ എന്നീ പ്രദേശങ്ങളിലുള്ളവർ 911 എന്ന നമ്പറിൽ ബന്ധപ്പെടണമെന്ന് അധികാരികൾ അറിയിച്ചു. രാജ്യത്തിന്റെ മറ്റ് പ്രദേശങ്ങളിലുള്ളവർ 999, 996 എന്നീ നമ്പറുകളിലും അറിയിക്കണമെന്നും പരിസ്ഥിതി സുരക്ഷസേന ആവശ്യപ്പെട്ടിട്ടുണ്ട്.
