സീരിയൽ താരം രാഹുൽ രവിയ്ക്കെതിരെ ലുക്കൗട്ട് നോട്ടീസ്. രാഹുലിന് മറ്റൊരാളുമായി ബന്ധമുണ്ടെന്ന ആരോപണത്തിന് പിന്നാലെ രാഹുലിനെ കാണാനില്ലെന്ന തരത്തിൽ ഭാര്യ പൊലീസിൽ പരാതി നൽകിയിരുന്നു, ഇതിന് പിന്നാലെയാണ് ചെന്നൈ പൊലീസ് ലുക്ക് ഔട്ട് നോട്ടീസ് പുറത്തിറക്കിയിരിക്കുന്നത്.
കന്നഡയിലും തമിഴിലും സംപ്രേക്ഷണം ചെയ്ത നന്ദിനി എന്ന സീരിയലിലൂടെയാണ് രാഹുൽ രവി താരമായത്. പൊന്നമ്പിളി സീരിയലിലെ ഹരി എന്നാണ് രാഹുൽ രവിയെ മലയാളികൾ അറിയപ്പെടുന്നത്. 2020ൽ മോഡലും പ്രൊഫഷണലുമായ ലക്ഷ്മി എസ് നായരെയാണ് താരം ജീവിത പങ്കാളിയാക്കിയത്. പെരുമ്പാവൂരിൽ വച്ചായിരുന്നു വിവാഹം. വിവാഹത്തിന്റെ ചിത്രങ്ങളും വീഡിയോയും സോഷ്യൽ മീഡിയയിൽ വൈറലായിരുന്നു. എന്നാൽ അധികം വൈകാതെ ഇരുവരും പിരിയുകയായിരുന്നു.
2023 ഏപ്രിൽ 26 ന് അർദ്ധരാത്രി മറ്റൊരു സ്ത്രീക്കൊപ്പം ലക്ഷ്മി രാഹുലിനെ പിടികൂടിയെന്ന തരത്തിലും വാർത്തകൾ പ്രചരിച്ചിരുന്നു. ലക്ഷ്മിയെ രാഹുൽ സ്ഥിരമായി മർദ്ദിക്കാറുണ്ട് എന്നും റിപ്പോർട്ടുകളുണ്ട്. മദ്രാസ് ഹൈക്കോടതിയുടെ ഉത്തരവിനെ തുടർന്ന് നവംബർ 3ന് രാഹുലിന്റെ ജാമ്യം റദ്ദാക്കിയിരുന്നു. പിന്നാലെയാണ് അറസ്റ്റ് വാറണ്ട് പുറപ്പെടുവിക്കുന്നത്. അതേസമയം ലക്ഷ്മിയ്ക്ക് മാനസിക പ്രശ്‌നമാണെന്നാണ് രാഹുലിന്റെ വാദം.
