ആരാധകർ ഏറെ പ്രതീക്ഷയോടെ കാത്തിരുന്ന പ്രഖ്യാപനം ഇതാ! രജനികാന്തിന് പിറന്നാൾ സമ്മാനമായി താരത്തിന്റെ പുതിയ ചിത്രത്തിന്റെ ടൈറ്റിൽ പുറത്ത് വീട്ടിരിക്കുകയാണ് തലൈവർ 170 ടീം. രജനികാന്തിനെ നായകനാക്കി ടിജെ ജ്ഞാനവേൽ സംവിധാനം ചെയ്യുന്ന ചിത്രത്തിന് ‘വേട്ടയ്യൻ’ എന്നാണ് പേരിട്ടിരിക്കുന്നത്. നിർമാതാക്കളായ ലൈക്ക പ്രൊഡക്ഷൻസ് ആണ് ടൈറ്റിൽ റിവീലിങ് ടീസർ പുറത്തിറക്കിയത്.
‘സൂപ്പർ സ്റ്റാർ രജനി’ ആമുഖ കാർഡിന്റെ പശ്ചാത്തലത്തിൽ സംഗീതസംവിധായകൻ അനിരുദ്ധ് രവിചന്ദ്രന്റെ ഒരു പുതിയ ആമുഖ സൗണ്ട്‌ട്രാക്ക് കൂടി ആയപ്പോൾ ടൈറ്റിൽ ടീസറിന്റെ റിലീസ് കൂടുതൽ ഗംഭീരമായി. രജനികാന്ത് മാഗ്നറ്റിക് ക്ലിപ്പ്-ഓൺ സൺഗ്ലാസ് ധരിച്ച് വലിയ തോക്ക് കയ്യിൽ പിടിച്ച്, “വേട്ടയാടുമ്പോൾ ഇര വീഴണം” എന്ന ഡയലോഗ് പറയുന്നത് ആരാധകർക്കിടയിൽ ആവേശം പരത്തുന്നതാണ്.
അമിതാഭ് ബച്ചൻ, ഫഹദ് ഫാസിൽ, റാണാ ദഗ്ഗുബതി, മഞ്ജു വാര്യർ, റിതിക സിംഗ്, ദുഷാര വിജയൻ എന്നിവരടങ്ങുന്ന ഒരു വലിയ താരനിരയാണ് ചിത്രത്തിൽ അണി നിരക്കുന്നത്. ജിഎം സുന്ദർ, രോഹിണി, റാവു രമേഷ്, രമേഷ് തിലക്, രക്ഷൻ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
