ഷാർജ ഇന്ത്യൻ അസോസിയേഷൻ ഭരണസമിതി തെരഞ്ഞെടുപ്പ് ഇന്ന്. മുൻ പ്രസിഡന്റ് ഇ.പി ജോൺസൻ, നിലവിലെ പ്രസിഡന്റ് വൈ. എ. റഹീം എന്നിവർ നേതൃത്വം നൽകുന്ന കോൺഗ്രസ് സംഘടനകളുടെ മുന്നണിയായ ജനാധിപത്യ മുന്നണി കെ എം സി സി നേതാവ് നിസാർ തളങ്കര, സി പി എം സംഘടനയായ മാസിന്റെ നേതാവ് ശ്രീപ്രകാശ് എന്നിവർ നേതൃത്വം നല്‍കുന്ന ലീഗ്-സി.പി.എം മുന്നണിയായ മതേതര ജനാധിപത്യ മുന്നണി എന്നിവര്‍ തമ്മിലാണ് പ്രധാന മത്സരം. ബി.ജെ.പി സംഘടനയായ ഐ പി എഫ് നേതൃത്വം നൽകുന്ന സമഗ്ര വികസന മുന്നണിയും രംഗത്തുണ്ട്.
മുസ്ലിം ലീഗ്, സി.പി.എം അനുഭാവ സംഘടനകൾ ഒരു മുന്നണിയായി കോൺഗ്രസ് സഖ്യത്തിനെതിരെ മത്സരിക്കുന്നു എന്നതാണ് ഇത്തവണത്തെ തെരഞ്ഞെടുപ്പിന്റെ പ്രാധാന്യം.
ഷാർജ ഇന്ത്യൻ സ്കൂളിലാണ് പോളിങ്. വൈകുന്നേരം ആറ് വരെയാണ് പോളിങ് സമയം. ആറരക്ക് വോട്ടെണ്ണൽ തുടങ്ങും. രാത്രി ഒമ്പതോടെ ഫല സൂചനകൾ ലഭ്യമായി തുടങ്ങും.
