എറണാകുളത്തെ കളമശ്ശേരി കുസാറ്റ് ക്യാമ്പസിൽ ടെക് ഫെസ്റ്റിനിടെ ഉണ്ടായ അപകടത്തില്‍ മരിച്ച സാറ തോമസിന് മുഖ്യമന്ത്രി പിണറായി വിജയനും മറ്റു മന്ത്രിമാരും അന്തിമോപചാരമര്‍പ്പിച്ചു. സാറയുടെ മൃതദേഹം പൊതുദര്‍ശനത്തിന് എത്തിച്ച താമരശ്ശേരി കോരങ്ങാട് അല്‍ഫോന്‍സാ സ്‌കൂളിലെത്തിയാണ് മന്ത്രിമാര്‍ അന്തിമോപചാരമര്‍പ്പിച്ചത്. നവകേരള സദസ്സ് ജില്ലയില്‍ പുരോഗമിക്കുന്നതിനിടെയായിരുന്നു മന്ത്രിമാരുടെ സംഘത്തിന്റെ സന്ദര്‍ശനം.
മന്ത്രിമാരായ വീണാ ജോര്‍ജ്, ചിഞ്ചുറാണി, കെ. കൃഷ്ണന്‍കുട്ടി, ആന്റണി രാജു, പി.എ. മുഹമ്മദ് റിയാസ്, സജി ചെറിയാന്‍, കെ.എന്‍. ബാലഗോപാല്‍, എ.കെ. ശശീന്ദ്രന്‍, വി. അബ്ദുറഹ്‌മാന്‍, വി. ശിവന്‍കുട്ടി ഉള്‍പ്പെടെയുള്ളവര്‍ മുഖ്യമന്ത്രിയെ അനുഗമിച്ചു. നവകേരള സദസ്സിന്റെ ബസ്സിലായിരുന്നു മന്ത്രിമാര്‍ സ്ഥലത്തെത്തിയത്. സാറയുടെ സംസ്‌കാരം തിങ്കളാഴ്ച രാവിലെ പത്തുമണിക്ക് ഈങ്ങാപ്പുഴ സെന്റ് ജോര്‍ജ് ഓര്‍ത്തഡോക്‌സ് പള്ളിയില്‍ നടക്കും.
അതേസമയം ദുരന്തത്തില്‍ മരിച്ച കൂത്താട്ടുകുളം കിഴകൊമ്പ് കൊച്ചുപാറയില്‍ കെ.എം. തമ്പിയുടെ മകന്‍ അതുല്‍ തമ്പിയുടെ മൃതദേഹം സംസ്‌കരിച്ചു. കൂത്താട്ടുകുളത്തെ കുടുംബ കല്ലറയിലാണ് മൃതദേഹം സംസ്കരിച്ചത്. പാലക്കാട് മുണ്ടൂര്‍ എഴക്കാട് കോട്ടപ്പള്ളം തൈപ്പറമ്പില്‍ സ്വദേശി ആല്‍ബിന്‍ ജോസഫിന്റെ സംസ്‌കാരച്ചടങ്ങുകള്‍ ഇന്ന് വൈകീട്ടോടെ നടന്നു. മൈലമ്പിള്ളി പള്ളി സെമിത്തേരിയിലാണ് സംസ്‌കാര ചടങ്ങുകൾ നടത്തിയത്. ആന്‍ റിഫ്റ്റയുടെ സംസ്‌കാരം ചൊവ്വാഴ്ച നടക്കും. ഇറ്റലിയിലുള്ള അമ്മ നാട്ടിലെത്തിയ ശേഷമായിരിക്കും സംസ്‌കാരം നടക്കുക.
