യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിന്റെയും ദുബായ് കിരീടാവകാശിയും എക്സിക്യൂട്ടീവ് കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമിന്റെയും മുഖങ്ങളുള്ള 50 ദിർഹത്തിന്റെ വെള്ളി നാണയം പുറത്തിറക്കി യുഎഇ സെൻട്രൽ ബാങ്ക് (CBUAE). നാണയത്തിന്റെ മറുവശത്ത് നാമമാത്രമായ മൂല്യത്തിന് ( ദിർഹം 50) പുറമെ അറബിയിലും ഇംഗ്ലീഷിലും സിബിയുഎഇയുടെ പേരിനാൽ ചുറ്റപ്പെട്ട യുഎഇയുടെ ലോഗോയുമുണ്ട്.
40 ഗ്രാം ഭാരമുള്ള 3,000 വെള്ളി നാണയങ്ങളാണ് ഇപ്പോൾ യുഎഇ സെൻട്രൽ ബാങ്ക് പുറത്തിറക്കിയിരിക്കുന്നത്. മുഹമ്മദ് ബിൻ റാഷിദ് അൽ മക്തൂം ക്രിയേറ്റീവ് സ്പോർട്‌സ് അവാർഡിന്റെ 12-ാ മത് പതിപ്പ് ആഘോഷിക്കുന്നതിന്റെ ഭാഗമായാണ് പുതിയ നാണയങ്ങൾ ഇറക്കിയിരിക്കുന്നത് എന്ന് ഔദ്യോഗിക വൃത്തങ്ങൾ അറിയിച്ചു.
