ദിലീപ് നായകനായെത്തിയ ‘ബാന്ദ്ര’ സിനിമയ്ക്ക് മോശം റിവ്യൂ നൽകിയ വ്ലോഗർമാർക്കെതിരെ കേസെടുക്കണമെന്ന ആവശ്യവുമായി നിർമാതാക്കൾ കോടതിയിൽ. അശ്വന്ത് കോക്ക്, ഉണ്ണി ബ്ലോഗ്സ്, ഷിഹാബ്, ഷാസ് മുഹമ്മദ്, അര്‍ജുൻ, സായ് കൃഷ്ണ,ഷിജാസ് ടോക്ക്സ് എന്നീ ഏഴ് യൂട്യൂബർമാർക്കെതിരെയാണ് നിർമാതാക്കളായ അജിത് വിനായക ഫിലിംസ് തിരുവനന്തപുരം ജുഡിഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയെ സമീപിച്ചത്.
ചിത്രം റിലീസ് ചെയ്ത് മൂന്നു ദിവസത്തിനകം തന്നെ കമ്പനിയ്ക്ക് നഷ്ടമുണ്ടാകുന്ന തരത്തിൽ നെഗറ്റീവ് റിവ്യൂ നടത്തിയെന്നാണ് ഹർജിയിലെ ആരോപണം. ഇതിനെതിരെ കേസെടുക്കാൻ തിരുവനന്തപുരം സിറ്റി പൊലീസ് കമ്മിഷണർക്ക് നിർദ്ദേശം നൽകണമെന്നും നിർമാണ കമ്പനി ഹര്‍ജിയിൽ ആവശ്യപ്പെടുന്നു. ചിത്രത്തെ അപകീർത്തിപ്പെടുത്തുന്ന തരത്തിൽ സോഷ്യൽ മീഡിയ വഴി വ്യാജവും മോശവും പ്രേക്ഷകരെ തെറ്റിദ്ധരിപ്പിക്കുന്നതുമായ കാര്യങ്ങൾ പ്രചരിപ്പിക്കുന്നു എന്നും നിർമാതാക്കൾ ആരോപിച്ചു. ഇവർ ചെയ്യുന്നത് അപകീർത്തിപ്പെടുത്തൽ മാത്രമല്ല കൊള്ളയടിക്കലാണെന്നും നിര്‍മാതാക്കൾ കൂട്ടിച്ചേർത്തു.
ഈയടുത്ത കാലത്ത് ഏറ്റവും കൂടുതൽ ചർച്ചയായ വിഷയമാണ് ‘റിവ്യൂ ബോംബിങ്’. സമൂഹമാധ്യമങ്ങളിലൂടെ നെഗറ്റീവ് റിവ്യൂ പങ്കുവച്ച് സിനിമയെ തകർക്കുന്നതിനെയാണ് ‘റിവ്യൂ ബോംബിങ്’ എന്ന് കോടതി പോലും അടയാളപ്പെടുത്തിയിട്ടുണ്ട്. സിനിമയെക്കുറിച്ച് അഭിപ്രായം പറയാൻ എല്ലാവർക്കും അവകാശം ഉണ്ടെങ്കിലും മനഃപൂർവം വ്യക്തിഹത്യ നടത്തുന്ന രീതിയിലുള്ള നിരൂപണമോ നെഗറ്റീവ് റിവ്യൂ, ബ്ലാക്ക് മെയിലിങ് എന്നീ ക്രിമിനൽ സ്വഭാവമുള്ള ഇടപെടലോ നടന്നാൽ പരാതിപ്പെടാമെന്ന് പൊലീസ് പറയുന്നു.
