താമസ, തൊഴിൽ, അതിർത്തി സുരക്ഷാനിയമങ്ങൾ ലംഘിക്കുന്നവരെ കണ്ടെത്താൻ പരിശോധന കർശനമാക്കി സൗദി അറേബ്യ. ഒരാഴ്ച്ചയ്ക്കിടെ ഇത്തരത്തിൽ 17,300 പേരാണ് പിടിയിലായെന്ന് ആഭ്യന്തര മന്ത്രാലയം അറിയിച്ചു. വിവിധ സുരക്ഷാ വിഭാഗങ്ങൾ ചേർന്നാണ് പരിശോധന നടത്തുന്നത്. താമസനിയമ ലംഘനം നടത്തിയ 10 ,000 പേർ, അതിർത്തി സുരക്ഷാ ചട്ടങ്ങൾ ലംഘിച്ച 3,900 പേർ, തൊഴിൽ നിയമ ലംഘനം നടത്തിയ 2,611പേർ എന്നിങ്ങനെയാണ് അറസ്റ്റിലായവരുടെ കണക്ക്.
രാജ്യത്തേക്ക് അതിർത്തി കടക്കാൻ ശ്രമിക്കുന്നതിനിടെ 626 പേർ അറസ്റ്റിലായി. ഇവരിൽ 57 ശതമാനം യമനികളും 40 ശതമാനം എത്യോപ്യക്കാരും മൂന്ന് ശതമാനം മറ്റ് രാജ്യക്കാരുമാണ്. അതേസമയം 24 നിയമ ലംഘകർ രാജ്യത്ത്‌ നിന്ന് പുറത്തുകടക്കാൻ ശ്രമിക്കുന്നതിനിടെ പിടിയിലായിട്ടുണ്ട്. താമസ, തൊഴിൽ ചട്ടങ്ങൾ ലംഘിക്കുന്നവരെ കടത്തിക്കൊണ്ടുവരികയും അവർക്ക് അഭയം നൽകുകയും നിയമ ലംഘനത്തിന് കൂട്ട് നിൽക്കുകയും ചെയ്ത ഒമ്പത് പേരെയും അറസ്റ്റ് ചെയ്തിട്ടുണ്ട്.
നിലവിൽ ആകെ 51,000 ത്തോളം നിയമലംഘകർ ചട്ടങ്ങൾ ലംഘിച്ചതിന് നടപടികൾക്ക് വിധേയരായിട്ടുണ്ട്. 44,000 പേരേ നാടുകടത്തുന്നതിനുവേണ്ടി അവരുടെ യാത്രാരേഖകൾ ശരിയാക്കാൻ അതാത് രാജ്യങ്ങളുടെ എംബസികളിലേക്ക് കൈമാറി. കൂടാതെ 1,800 പേരെ യാത്രാ റിസർവേഷൻ പൂർത്തിയാക്കാനും ശിപാർശ ചെയ്തിട്ടുണ്ട്. 7,800 ഓളം നിയമലംഘകരെ ഇതിനകം നാടുകടത്തി എന്നാണ് റിപ്പോർട്ട്‌. രാജ്യത്തേക്ക് നുഴഞ്ഞുകയറാൻ ശ്രമിക്കുന്നവർക്ക് പ്രവേശനം സുഗമമാക്കുകയോ ഗതാഗതമോ അഭയമോ മറ്റ് ഏതെങ്കിലും സഹായമോ സേവനമോ നൽകുകയോ ചെയ്യുന്നത് ഗുരുതരമായ കുറ്റമാണ് എന്ന് മന്ത്രാലയം ആവർത്തിച്ചു. അങ്ങനെ ചെയ്താൽ 15 വർഷം വരെ തടവും പരമാവധി 10 ലക്ഷം റിയാൽ പിഴയുമാണ് ശിക്ഷയെന്നും മന്ത്രാലയം മുന്നറിയിപ്പ് നൽകി.
