അസ്ഥിര കാലാവസ്ഥയില്‍ ട്രാഫിക് മുന്നറിയിപ്പുകൾ പാലിക്കണമെന്ന് അബുദാബി പൊലീസ്. യുഎഇയില്‍ വരും ദിവസങ്ങളില്‍ കാലാവസ്ഥ അസ്ഥിരമാകുമെന്നും വാഹനാപകടങ്ങൾ ഒ‍ഴിവാക്കാന്‍ ജാഗ്രത തുടരണമെന്നും പൊലീസ് വ്യക്തമാക്കി.
സുരക്ഷിതമായ ഡ്രൈവിംഗ് പാലിക്കണമെന്ന് അബുദാബി പോലീസ് ഡ്രൈവർമാരോട് അഭ്യർത്ഥിച്ചു.
വാഹനം ഓടിക്കുന്നതിന് മുമ്പ് കാലാവസ്ഥ നിരീക്ഷിക്കണം. വാഹനങ്ങൾക്കിടയിൽ മതിയായ സുരക്ഷാ അകലം ഉറപ്പാക്കണമെന്നും റോഡ് ഉപയോക്താക്കളോട് പോലീസ് പറഞ്ഞു. എമിറേറ്റിലുടനീളമുള്ള ഇലക്‌ട്രോണിക് ഇൻഫർമേഷൻ ബോർഡുകളിൽ പ്രദർശിപ്പിച്ചിരിക്കുന്ന വേഗപരിധി പാലിക്കാന്‍ തയ്യാറാകണമെന്നും പൊലീസ് ഡ്രൈവർമാരെ അറിയിച്ചു. ഉയർന്ന കാറ്റും പൊടിയും ഉള്ളപ്പോൾ ദൂരക്കാഴ്ച സാരമായി കുറയുമെന്നും അബുദാബി പോലീസ് ട്രാഫിക് ആൻഡ് പട്രോൾസ് ഡയറക്ടറേറ്റ് മുന്നറിയിപ്പ് നൽകി.
വാഹനമോടിക്കുമ്പോൾ മൊബൈല്‍ ഫോണ്‍ ഉപയോഗം ഒ‍ഴിവാക്കണം. വീഡിയോ കോളുകളോ വീഡിയോ ചിത്രീകരണമൊ പാടില്ല. ഡ്രൈവിങ്ങിനിടയില്‍ ശ്രദ്ധ തിരിയുന്ന പ്രവര്‍ത്തനങ്ങളില്‍ ഏര്‍പ്പെടരുതെന്നും നിങ്ങളെപ്പോലെ തന്നെ റോഡിലുളള മറ്റുളളവരുടേയും ജീവനും പ്രധാനമാണെന്നും പൊലീസ് ഓര്‍മ്മിപ്പിച്ചു.
മഴക്കാലത്ത് സുരക്ഷിതമായ ഡ്രൈവിംഗ് പാലിക്കാൻ ഡ്രൈവർമാരെ ബോധവൽക്കരിക്കുക, ഇതര പ്രതിരോധ നടപടികൾ ശക്തിപ്പെടുത്തുക തുടങ്ങി വിവധ പരിപാടികളും പൊലീസ് നടപ്പാക്കുന്നുണ്ട്. താഴ്‌വരകൾക്കും മലയിടുക്കുകൾക്കും സമീപം കൂട്ടം കൂടുന്നത് ഒഴിവാക്കണമെന്ന് പൊലീസ് താമസക്കാരോട് അഭ്യര്‍ത്ഥിച്ചിട്ടുണ്ട്.
