യുഎഇയിലെ സർക്കാർ സേവനങ്ങൾ സുഗമമാക്കുന്നതിനും ഗുണനിലവാരം ഉയർത്തുന്നതിനുമായി നിരവധി നടപടിക്രമങ്ങൾ റദ്ദാക്കും. അനാവശ്യമെന്ന് തോന്നുന്ന രണ്ടായിരത്തോളം നടപടിക്രമങ്ങളാണ് 2024-ഓടെ റദ്ദാക്കാൻ തീരുമാനിച്ചിരിക്കുന്നത്.
യുഎഇ വൈസ് പ്രസിഡന്റും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം ആരംഭിച്ച സ്മാർട്ട് ഗവൺമെന്റ് സംരംഭത്തെ അടിസ്ഥാനമാക്കിയാണ് പുതിയ തീരുമാനം. ഇതനുസരിച്ച് മന്ത്രാലയങ്ങളും സർക്കാർ ഏജൻസികളും അനാവശ്യ സേവനങ്ങളും വ്യവസ്ഥകളും റദ്ദാക്കുന്നതോടെ സമയലാഭവും സേവനങ്ങൾ ഉപയോഗിക്കാൻ എളുപ്പമാകുമെന്നുമാണ് വിലയിരുത്തൽ.
2024 മുതൽ 2026 വരെ 246.6 ബില്യൺ ദിർഹം ചെലവഴിക്കുന്ന ദുബായ് ബജറ്റിന് അംഗീകാരം നൽകിയതിന് പിന്നാലെയായിരുന്നു പുതിയ പ്രഖ്യാപനം അറിയിച്ചത്. രാജ്യത്തിന്റെ സാമ്പത്തിക വളർച്ചയിലും വികസനത്തിലും തുടർന്നും ശ്രദ്ധ കേന്ദ്രീകരിക്കുക, യുവാക്കളെ പിന്തുണയ്ക്കുക, പരിസ്ഥിതിയെ സംരക്ഷിക്കുന്ന പദ്ധതികൾ ആവിഷ്കരിക്കുക തുടങ്ങിയവ ഉൾപ്പെടെ വരും വർഷത്തേക്ക് സർക്കാർ സ്വീകരിക്കേണ്ട പ്രധാന അജണ്ടകളും ഷെയ്ഖ് മുഹമ്മദ് വ്യക്തമാക്കി.
