ഏകദിന ക്രിക്കറ്റ്‌ ലോകകപ്പ് മത്സരത്തില്‍ ബംഗ്ലാദേശിനെ ഏഴ് വിക്കറ്റിന് തകര്‍ത്ത് പാകിസ്താന്. ബംഗ്ലാദേശ് ഉയര്‍ത്തിയ 205 റണ്‍സ് വിജയലക്ഷ്യം പിന്തുടര്‍ന്ന പാകിസ്താന് 32.3 ഓവറില്‍ മൂന്ന് വിക്കറ്റ് മാത്രം നഷ്ടപ്പെടുത്തിയാണ് ലക്ഷ്യത്തിലെത്തിയത്. ഇതോടെ സെമിക്കുള്ള വിദൂര സാധ്യത നിലനിര്‍ത്താനും പാകിസ്താനായി. എന്നാൽ ആറാം തവണയും തോൽവി ഏറ്റുവാങ്ങിയതോടെ ബംഗ്ലാദേശ് ടൂര്‍ണമെന്റില്‍ നിന്ന് പുറത്തായി.
ഓപ്പണര്‍മാരായ ഫഖര്‍ സമാന്‍ – അബ്ദുള്ള ഷഫീഖ് കൂട്ടുകെട്ടാണ് പാക് ടീമിന്റെ ജയം എളുപ്പമാക്കിയത്. 21.1 ഓവറില്‍ 128 റണ്‍സാണ് ഇരുവരും സ്‌കോര്‍ബോര്‍ഡില്‍ ഏഴുതി ചേര്‍ത്തത്. പ്ലെയിങ് ഇലവനിലേക്ക് തിരിച്ചെത്തിയ ഫഖര്‍ സമാന്‍ തകര്‍പ്പന്‍ പ്രകടനം പുറത്തെടുത്തു. 74 പന്തുകള്‍ നേരിട്ട് മൂന്ന് ഫോറും ഏഴ് സിക്‌സും പറത്തി 81 റണ്‍സെടുത്ത സമാൻ തന്നെയാണ് പാകിസ്താന്റെ ടോപ് സ്‌കോററും.
ഷഫീഖ് 69 പന്തില്‍ നിന്ന് രണ്ട് സിക്‌സും ഒമ്പത് ഫോറുമടക്കം 68 റണ്‍സെടുത്തു. എന്നാൽ ക്യാപ്റ്റന്‍ ബാബര്‍ അസമിന് (9) ഈ മത്സരത്തിലും വേണ്ടത്പോലെ തിളങ്ങാനായില്ല. മുഹമ്മദദ് റിസ്വാന്‍ (26*), ഇഫ്തിഖര്‍ അഹമ്മദ് (17*) എന്നിവര്‍ പുറത്താകാതെ നിന്നു. അതേസമയം നേരത്തേ ടോസ് നേടി ആദ്യം ബാറ്റിങ്ങിനിറങ്ങിയ ബംഗ്ലാദേശ് 45.1 ഓവറില്‍ 204 റണ്‍സിന് ഓള്‍ ഔട്ടായി. മഹ്‌മദുള്ള, ലിട്ടണ്‍ ദാസ്, ക്യാപ്റ്റന്‍ ഷാക്കിബ് അല്‍ ഹസന്‍ എന്നിവരുടെ ഇന്നിങ്സുകളായിരുന്നു ബംഗ്ലാദേശിനെ 200 കടത്തിയത്.
70 പന്തില്‍ നിന്ന് 56 റണ്‍സെടുത്ത മഹ്‌മദുള്ളയാണ് ബംഗ്ലാദേശിന്റെ ടോപ് സ്‌കോറര്‍. ലിട്ടണ്‍ ദാസ് 64 പന്തുകള്‍ നേരിട്ട് 45 റണ്‍സെടുത്തു. നാലാം വിക്കറ്റില്‍ ഇരുവരും കൂട്ടിച്ചേര്‍ത്ത 79 റണ്‍സാണ് ബംഗ്ലാദേശ് ഇന്നിങ്സിലെ ഉയർന്ന കൂട്ടുകെട്ട്.
