18-ാം വാർഷികവും 14-ാം പൊതുഗതാഗത ദിനവും ആഘോഷിക്കാനൊരുങ്ങി ദുബായ് ആർ.ടി.എ. ജിം ഓൺ ദി ഗോ എന്ന പരിപാടിയിലൂടെ പൊതുജനങ്ങളുടെ ശാരീരിക ക്ഷമത വളർത്തുകയും സുരക്ഷിതമായ യാത്രകൾക്കായി പൊതുഗതാഗതം ഉപയോഗിക്കാൻ ജനങ്ങളെ പ്രേത്സാഹിപ്പിക്കുകയുമാണ് ആർ.ടി.എയുടെ ലക്ഷ്യം.
കഴിഞ്ഞ 8 മാസത്തിനുള്ളിൽ 450 ദശലക്ഷം പേർ പൊതുഗതാഗതം ഉപയോഗിച്ചതായും 12 ശതമാനത്തിന്റെ വളർച്ചാ നിരക്ക് ഈ മേഖലയിൽ രേഖപ്പെടുത്തിയതായും അധികൃതർ വ്യക്തമാക്കി. 2022-ൽ ദുബായിൽ നടത്തിയ 20.61 ശതമാനം യാത്രകളും പെതുഗതാഗത സംവിധാനം ഉപയോഗിച്ചായിരുന്നു. കൂടാതെ എമിറേറ്റിലെ ഗതാഗത സംവിധാനം കൂടുതൽ കാര്യക്ഷമമാക്കുന്നതിന്റെ ഭാഗമായി നിരവധി പാലങ്ങളും തുരങ്കങ്ങളും ഇതിനോടകം നിർമ്മിച്ചു. 2006-ൽ എമിറേറ്റിലെ പാലങ്ങളുടെയും തുരങ്കങ്ങളുടെയും എണ്ണം 129 ആയിരുന്നത് 2023-ൽ 988 ആയി ഉയർന്നതായും അധികൃതർ അറിയിച്ചു.
ദുബായിലെ ഗതാഗത സംവിധാനങ്ങൾ ദിനംപ്രതി വളർന്നുകൊണ്ടിരിക്കുകയാണെന്നും ഈ മേഖലയിൽ സമഗ്രമായ വികസനം ലക്ഷ്യംവെച്ച് പ്രവർത്തിച്ചതിനാൽ ലോകത്തിലെ ഏറ്റവും മികച്ച ഗതാഗത സൗകര്യങ്ങളുള്ള നഗരമായി മാറാൻ ദുബായിക്ക് സാധിച്ചെന്നും ദുബായ് ആർടിഎയുടെ ചെയർമാൻ മത്തർ അൽ തായർ പറഞ്ഞു.
