സാമ്പത്തിക തകർച്ച രൂക്ഷമായി തുടരുന്ന ശ്രീലങ്കയ്ക്ക് പുതിയ പ്രധാനമന്ത്രിയായി. ദിനേശ് ഗുണവർധന പ്രസിഡന്റ് റനിൽ വിക്രമസിംഗെയുടെ മുമ്പാകെ സത്യപ്രതിജ്ഞ ചെയ്ത് അധികാരമേറ്റെടുത്തു. മുൻ ആഭ്യന്തര തദ്ദേശ മന്ത്രിയും ഗോതബയ രജപക്സേ അനുകൂലിയുമാണ് പ്രധാനമന്ത്രി ദിനേഷ് ഗുണവർധന.
പുതിയ ഭരണം വന്നെങ്കിലും ശ്രീലങ്കയിൽ സാമ്പത്തിക സ്ഥിതിഗതികളിൽ പുരോഗതി ഒന്നുമില്ല. കൂടാതെ പ്രക്ഷോഭകരെ അടിച്ചമർത്താനുള്ള ശ്രമങ്ങൾ സർക്കാരിന്റെയും സൈന്യത്തിന്റെയും ഭാഗത്ത് നിന്ന് തുടങ്ങിക്കഴിഞ്ഞു എന്നാണ് റിപ്പോർട്ടുകൾ.
സർക്കാർ മന്ദിരങ്ങൾക്ക് മുന്നിലെ ക്യാമ്പുകളിൽ സൈനിക നടപടികൾ തുടങ്ങി. സെക്രട്ടേറിയേറ്റിന് മുന്നിലെ പ്രക്ഷോഭകരുടെ സമരപ്പന്തലുകൾ സൈന്യം തകർത്തു. നിരവധി പ്രക്ഷോഭകരെ അറസ്റ്റ് ചെയ്തു. ഇന്ന് പുലർച്ചെയോടെയായിരുന്നു സൈനിക നടപടി. സൈന്യത്തിന്റെ നീക്കത്തിനെതിരെ പ്രതിഷേധിച്ച പ്രക്ഷോഭകർക്ക് നേരെ ലാത്തിചാർജ് നടത്തി. സൈനിക നടപടിക്കെതിരെ പ്രതിഷേധിച്ച 9 പേരെ അറസ്റ്റ് ചെയ്തു. പ്രസിഡന്റിന്റെ ഓഫീസിനകത്ത് ഉണ്ടായിരുന്ന പ്രക്ഷോഭകരെ ഒഴിപ്പിക്കുകയും ചെയ്തു. ഇന്ന് വൈകിട്ടോടെ പ്രക്ഷോഭകർ പൂർണമായി സ്ഥലം ഒഴിയണമെന്നാണ് നിർദേശം. മറ്റുള്ള സർക്കാർ മന്ദിരങ്ങളുടെ നിയന്ത്രണം പ്രക്ഷോഭകരിൽ നിന്നും സൈന്യം ഏറ്റെടുത്തു കഴിഞ്ഞു.
